Улуғбек Муҳаммадиев Президент маслаҳатчисига ўринбосар этиб тайинланди

Улуғбек Муҳаммадиев Президентнинг фуқаролар ҳуқуқларини ҳимоя қилиш ва мурожаатлар билан ишлаш масалалари бўйича маслаҳатчисининг биринчи ўринбосари лавозимига тайинланди. Бу ҳақда «Янги Ўзбекистон» хабар берди.

Фото: Давлат хизматлари агентлиги ахборот хизмати

Маълум қилинишича, у бунгача Адлия вазирлиги ҳузуридаги Давлат хизматлари агентлиги директори лавозимида ишлаб келган. Биринчи ўринбосар лавозимига тайинланиши муносабати билан Давлат хизматлари агентлиги директори лавозимидан озод этилган.

Маълумот ўрнида, Улуғбек Муҳаммадиев 2020 йил 30 июль куни Давлат хизматлари агентлиги директори этиб тайинланганди. У бунга қадар Президентнинг фуқаролар ҳуқуқларини ҳимоя қилиш ва мурожаатлар билан ишлаш масалалари бўйича маслаҳатчисининг биринчи ўринбосари лавозимида фаолият юритган.

Аввалроқ Бахтиёр Исломов Президентнинг ҳуқуқни муҳофаза қилувчи ва назорат органлари фаолиятини мувофиқлаштириш масалалари бўйича маслаҳатчиси лавозимига тайинланганди. Шунингдек, Президент фармони билан Шоазим Шоисламович Миноваров Президентнинг жамоат ва диний ташкилотлар билан ҳамкорлик масалалари бўйича маслаҳатчиси лавозимига тайинланганди.