Андижон вилояти перенатал марказида 12 туп нина баргли сосна дарахтлари 16 январга ўтар кечаси кесиб ташланди. Вилоят ҳокимлиги ахборот хизмати ҳолат назоратга олингани ҳамда ўрганиш ишлари олиб борилаётганини маълум қилди.

Туғуруқхонадаги қурилиш лойиҳасига кўра, ҳозирги кунда ҳудудда 180 дан ортиқ манзарали дарахт ва кўчатлар экиш ишлари амалга оширилмоқда. Бундан ташқари, ҳокимлик дарахтлар ўз жойида тургани ҳамда ҳеч ким уларни кесиб ташлаш тўғрисида буйруқ бермаганини айтган.

«Юқорида келтирилган ҳолат вилоят ҳокимлиги томонидан алоҳида назоратга олинди. Ҳудудда конун бузилиш ҳолатлари аниқланган тақдирда айбдорларга қонуний жазо чоралари кўрилиши ва бу ҳақида батафсил ахборот берилишини маълум қиламиз», — дейилади хабарда.

Мазкур ҳолат юзасидан Экология қўмитаси ҳам ўз муносабатини билдириб ўтди. Таъкидланишича, вазият юзасидан вилоят Экология ва атроф-муҳитни муҳофаза қилиш бошқармаси ҳамда Ички ишлар бошқармаси масъул ходимлари томонидан тезкор ўрганиш ишлари олиб борилмоқда.

Аниқланишича, мазкур ҳудуддаги дарахтларни кесишга қонунчиликда белгиланган тартибда экология органи хулосаси ва рухсатнома берилмаган. Қурилиш объекти давлат инвестиция дастурига киритилган бўлиб, ташкилот раҳбарияти томонидан унинг ҳудудидаги дарахтларни кесишга рухсатнома олиш учун Давлат хизматлари марказига мурожаат қилинган.

Лекин ушбу мурожаат натижасини кутмасдан, қонунга зид равишда ўзбошимчалик билан тунда ушбу ҳуқуқбузарлик ҳолати содир этилган. Ҳозирда суриштирув ишлари давом этмоқда.

Аввалроқ Фарғонадаги мактабда 2 туп қимматбаҳо чинор ноқонуний тарзда кесиб ташлангани маълум қилинганди. Шунингдек, Қарши шаҳар ҳокимлиги томонидан 47 туп дарахт кесиб ташлангани аниқлангани ва Хоразмда 11 туп дарахт кесиб ташлангани хабар қилинган.