Янгиликлар - 23:25 · 16.01.2022

Ҳиндистонда маймуннинг дафн маросимида 1,5 минг киши қатнашди — видео

Ҳиндистоннинг Мадхья-Прадеш штатидаги Далупура қишлоғи аҳолиси совуқдан қотиб ўлган маймун шарафига тантанали дафн маросими ва 1,5 минг кишилик мотам юришини уюштирди. Бу ҳақда «NdTv» хабар берди.

Кадр: «NdTv»

Маълум қилинишича, совуқдан ўлган маймун тез-тез бу қишлоққа келиб турган, аҳоли эса унга қараган. Вақт ўтиши билан одамлар маймунга боғланиб қолган, бундан ташқари, минтақада мазкур ҳайвонлар жуда ҳурматли ҳисобланади. Маҳаллий аҳоли одамларга боғланган маймунни муқаддас ҳайвон деб билган, улар маймун ҳинд худоси Ҳануманни эслатишини айтган.

Таъкидланишича, 2021 йил декабрь охирида маймун қишлоққа совуққотган ҳолда келган. Маҳаллий аҳоли уни қутқариб қолишга ҳаракат қилиб, ветеринарга олиб борган. Бироқ даволаниш муваффақиятсиз тугаб, маймун музлашдан нобуд бўлган. Қишлоқ аҳолиси муқаддас ҳайвон хотирасини ҳурмат қилишга қарор қилиб, 1500 киши иштирокида кремация (рементация — ўлик танани куйдириш), мадҳия ва зиёфат билан тантанали дафн маросими уюштирган.

«Бизнинг қишлоғимизда шундай одат борки, агар бу ерда маймун ўлиб қолса, унинг дафн маросимини ўтказиш учун барча аҳоли йиғилади»,— деган маҳаллий аҳолидан бири.

Вилоятнинг яқин-атрофдаги қишлоқлари аҳолиси тантанали маросимларда қатнашишга қарор қилган. Баъзилар дафн маросимига Далупурадан 50 километр узоқликдаги қишлоқлардан иштирок этган. Хотира кечаси учун ташкилотчилар дала ўртасида 1500 дан ортиқ кишини сиғдира оладиган катта чодир ўрнатган. Ҳиндуларнинг одатига кўра, маймун куйдирилган, унга ер усти мақбараси қурилган. Кўпгина ҳиндулар мотам белгиси сифатида сочини олдирган.

Таъкидланишича, расмийлар тадбирда иштирок этган 2 кишини каратин чекловларини бузгани учун ҳибсга олган.

Аввалроқ АҚШдаги ҳайвонот боғида маймунлар коронавирусга чалингани ҳақида хабар берилган. Шунингдек, Ҳиндистон расмийлари 2,5 минг каркидон шохини ёқиб юборгани айтилган.