Россиялик гематолог Павел Трахтман нега коронавирус билан касалланган беморлар терисида гематомалар (кўкариш — органларнинг ёпиқ ва очиқ жароҳатларида қоннинг тўпланиши) пайдо бўлиши мумкинлигини тушунтирди. Бу ҳақда «Sputnik» хабар берди.

Унинг сўзларига кўра, коронавирус қон ивишини кучайтиради, оқибатда қон қуюқлашиб, томирлар бўйлаб ҳаракатланишда қийналиб, тўқималарда қолиб кетади. «Коронавирусни даволашда қўлланадиган дорилар орасида жуда қатъий кўрсатмалар бўйича буюриладиган антикоагулянтлар (қон ивишига қарши препаратлар) ҳам бор. Шу сабабли уларни қабул қилиш терида турли кўкаришларни келтириб чиқаради», — деб тушунтирган Трахтман.

Шунингдек, у агар беморларнинг танасида гематома аниқланса, шошилинч равишда шифокорга мурожаат қилишни маслаҳат берган. Унинг таъкидлашича, коронавирусни даволаш фонида тез-тез кўкаришлар пайдо бўлиши шифокорга қон ивиш тизимини диққат билан кўриб чиқишга сигнал беради.  Мутахассис кўкаришлар нафақат ковид, балки бошқа хавфли касалликларнинг ҳам аломати бўлиши мумкинлигини қўшимча қилган. «Агар терида гематомалар ҳеч қандай ташқи таъсирларсиз, яъни бирор жароҳат сабабли юзага келмаган бўлса, дарҳол шифокорга мурожаат қилиш керак», — деган у.

Аввалроқ мушуклар қонида инсонлар учун хавфли бўлган коронавирус топилгани ва ковид юрак фаолиятига қандай таъсир қилиши хабар қилинган.