Россиянинг Санкт-Петербург шаҳрида ўзбекистонлик эркак санъат саройи қурилаётган майдончада баландликдан  йиқилиб, ҳалок бўлди. Бу ҳақда «Фонтанка» хабар берди.

Маълум қилинишича, 10 январь куни тушдан кейин шаҳарда олиб борилаётган  қурилиш майдончаларидан бирида мигрант ишчининг баландликдан қулаб тушгани ҳақида хабар берилган. Олинган жароҳатлари оқибатида 37 ёшли эркак воқеа жойида ҳалок бўлган.

Қайд этилишича, тергов бўлими эркакнинг ўлим ҳолатини ўрганаётган бўлиб, ҳодиса юзасидан Россия Жиноят кодексининг 216-моддаси (Қурилиш ёки бошқа ишларни бажаришда хавфсизлик қоидаларини бузиш) билан жиноят иши қўзғатилган.

Аввалроқ Россияда ўзбекистонлик эркак 15-қаватдан тушиб кетиб, ҳалок бўлганди. Шунингдек, мамлакатда ўзбекистонлик 6 ёшли бола 4-қаватдан тушиб кетгани маълум қилинганди ҳамда ўзбекистонлик эркак бешинчи қаватдан қулаб, вафот этганди.