Россиянинг Санкт-Петербург шаҳрида ўзбекистонлик эркак 6 ёшли қизни номусига текканликда гумонланиб, қўлга олинди. Бу ҳақда «Конкретно» хабар берди.

Маълум қилинишича, 14 январь куни 34 ёшли Ўзбекистон фуқаросидан 37 ёшли ҳамюрти шикоят қилган. Аёлнинг айтишича, Краснопутиловский кўчасидаги хонадонлардан бирида қўшниси унинг 6 ёшли қизига нисбатан жинсий зўравонлик қилган.

Таъкидланишича, эркак зудлик билан қўлга олинган ва унга нисбатан Россия Жиноят кодексининг 134-моддаси 4-қисми бўйича бешта жиноий иш қўзғатилган. Аризачи ҳам, гумонланувчи ҳам ноқонуний муҳожирлар бўлиб чиққан.

Ўз навбатида, Колпинский тумани полициясига 12 ва 13 ёшли икки қизнинг ота-онаси ўзбекистонлик 24 ёшли йигит устидан мурожаат қилиб, у «ВКонтакте» ижтимоий тармоғида қизлардан интим характердаги фотосуратларини юборишни сўраганини айтган. Гумонланувчи 13 январь куни кечқурун Понтон қишлоғи, Заводская кўчасида қўлга олинган. Ҳозирда унга нисбатан жиноят иши қўзғатиш масаласи ҳал қилинмоқда.

Аввалроқ террор гуруҳнинг ўзбекистонлик тарафдори Россияда қўлга олингани ва Россияда 21 ёшли ўзбекистонлик йигит ватандоши томонидан пичоқлангани маълум қилинган.