Туркманистон полициясининг махсус кучлари намойишларни тўхтатиш учун юқори шай ҳолатга келтирилди. Бу ҳақда «Хроника Туркменистана» хабар берди.

Маълум қилишича, Ашхободдан 7 январь куни вилоят ҳуқуқ-тартибот идораларига Ички ишлар вазирлиги ва Миллий хавфсизлик вазирлигининг махсус бўлинмаларини юқори шай ҳолатга келтириш бўйича буйруқ келиб тушган. Шунингдек, тергов изоляторлари ва вақтинча сақлаш ҳибсхоналаридаги жойларни бўшатиш ва унчалик катта бўлмаган ҳуқуқбузарлик учун ўтирганларни озод этиш талаб қилинган.

Таъкидланишича, Туркманободдаги собиқ 8-колонияда кўп сонли маҳбусларни қабул қилиш учун бинолардан бири тайёрланган. У ерга яқин атрофда маҳаллий полициянинг махсус бўлинмаси жойлашган. Ўқотар қурол олиб юриш лицензиясига эга бўлган полиция ходимларига хизмат қуролларини бериш буюрилган. Бундай рухсатномани олиш учун полициячи Ашхободда 6 ойлик курсни ўташи керак. Қолган ходимлар резина дубинкалар билан қуролланиши ва кишанларга эга бўлиши керак.

Фавқулодда вазият юзага келган тақдирда Лебап вилоятининг барча махсус кучлари сигнал билан Ички ишлар вазирлигининг вилоят бошқармасига келиши кераклиги айтилган. Вилоятнинг куч тузилмалари ўртасидаги алоқани мувофиқлаштириш ва таъминлаш Миллий хавфсизлик вазирлигининг жойлардаги бошқармаси зиммасига юклатилган. Бу режим январь ойи охиригача сақланиб қолишига қарор қилинган.

Аввалроқ Туркманистон президенти мамлакатда интернет манбаларини чеклашни ва тартибсизликларга қарши курашиш бўйича тезкор ишлашни топширганди. Шунингдек, Бердимуҳамедов  истеъфога чиқиши мумкинлиги ва унинг ўғли Тошкентга келиши хабар қилинган.