Янгиликлар - 23:22 · 16.01.2022

Twitter Эрон олий раҳбарининг аккаунтини Трамп ҳақидаги видео сабаб блоклади

Эрон олий раҳбари Али Хоманаийнинг Twitter’даги аккаунти АҚШ собиқ президенти Дональд Трамп ҳақида жойлаган анимацион видеодан сўнг бутунлай блокланди. Бу ҳақда «Arab news» хабар берди.

Фото: «Reuters»

Маълум қилинишича, мазкур твитда Хоманаий АҚШ расмийларидан «қасос олиш» муқаррарлигини ҳам эълон қилган. Видеода Эрон услубидаги камуфляж кийган хакер жанговар роботни бошқараётгани тасвирланган, у Флорида кўчалари Трамп қароргоҳи томон ҳаракатланади. Видеода робот Трамп бошқа сиёсатчилар билан гольф ўйнаган ҳудудга кирган.

Таъкидланишича, хакер Трампнинг телефонига инглиз тилида «Сулаймонийнинг қотили ва буйруқ берган шахс товон тўлайди» деган хабар юборади. Жабрланувчи матнни ўқиётганда, хакер старт тугмасини босиб, дронга Трамни «йўқ қилиш» бўйича буйруқ беради.

Қосим Сулаймонийнинг ўлдирилиши

Сулаймоний 2020 йилнинг 3 январида Бағдод аэропортига қилинган ракета ҳужуми оқибатида ҳалок бўлган. Генерал бўлган карвонга ракета ҳужуми уюштириш буйруғи АҚШ собиқ президенти Дональд Трамп томонидан берилган. Сулаймоний Афғонистон, Ироқ, Сурия ва Ливия каби мамлакатларда Эрон сиёсатидаги энг нуфузли шахслардан бири саналган.

Бир томондан Сулаймоний АҚШга қарши курашган гуруҳлар қўмондони вазифасини бажарган бўлса, иккинчи томондан у Ироқда АҚШ ва Эрон ўртасидаги музокараларда асосий шахс сифатида қатнашган. Бу борада Сулаймоний нафақат саркарда, балки яхши дипломат сифатида ҳам танилган.

Қосим Сулаймоний ҳам Оятуллоҳ Али Хоманаийдан кейин Эроннинг хавфсизлик сиёсатини шакллантиришда энг нуфузли шахслардан бири бўлган.

Аввалроқ Эрон олий раҳбари АҚШ собиқ президенти Дональд Трампга таҳдид қилганди. Шунингдек, Сулаймонийнинг ўлдирилишида Исроилнинг қўли борлиги маълум қилинганди.