«Artel» компанияси корхонага махсус солиқ имтиёзлари берилгани бўйича маълумотлар нотўғри эканини маълум қилди. Бу ҳақда корхона матбуот хизмати баёнот берди.

Корхона расмийларининг қайд этишича, электротехника соҳасини ривожлантириш учун Ўзэлтехсаноат таркибига кирувчи барча ишлаб чиқарувчилар муайян солиқ имтиёзларига эга.

Шунингдек, бундай имтиёзлардан «Artel» компанияси ҳам Ўзэлтехсаноат таркибига кирувчи 100 дан ортиқ корхоналар билан тенг ҳуқуқда фойдаланиши айтилган.

Шундан келиб чиқиб корхона Ўзбекистон қонунчилигида «Artel» учун махсус ёки алоҳида тартибда имтиёзлар берилмаганини қайд этган. Бундан ташқари, компания расмийлари 2022 йилдаги солиқ қонунчилигидаги ўзгаришлар натижасида корхонанинг мол-мулк солиқ ҳисоблаш базаси 2,1 баробарга ортганини таъкидлаган.

Маълумот учун, Ўзэлтехсаноат таркибига кирувчи ишлаб чиқарувчиларга Президентнинг 2021 йил 2 мартдаги қарори билан бир қанча имтиёз берилган. Улар орасида 2021 йил 1 апрелдан 2024 йил 1 январга қадар ҳисобот даври якунлари бўйича электротехника маҳсулотларини сотишдан тушган тушуми миқдори умумий тушумининг 80 фоизидан кам бўлмаган электротехника тармоғи корхоналари учун бериладиган фойда солиғи ва мол-мулк солиғи бўйича ставкаларни 50 фоизга камайтириш тарзидаги солиқ имтиёзи бор.

Эслатиб ўтамиз, аввалроқ Ўзбекистонда юридик шахсларнинг мол-мулкига солинадиган солиқ ставкаси 2 фоиздан 1,5 фоизга пасайтирилганди. Лекин қонунчиликда мол-мулк солиғини ҳисоблашда бино ва иншоотлар қийматини ҳисоблашда минимал миқдор ўрнатилгани муҳомаларга сабаб бўлганди.

Шундан сўнг, 17 январда ўтказилган матбуот анжуманида Давлат солиқ қўмитаси раиси Шерзод Кудбиев солиқ имтиёзига эга йирик корхоналар бўйича журналистлар саволига жавоб берган.

Қўмита раиси «бой ва даромадли маҳаллий компаниялар», хусусан, «Artel» компанияси нега солиқ имтиёзларидан фойдаланиши, уларнинг юки иқтисодиётда қандай тақсимланиши ҳақида гапириб, имтиёз эгаларига тегишли барча маълумотларни очиқ айта олмаслигини билдирган. Шунингдек у ушбу гапларини солиқ сири важи билан изоҳлаган.