«Баъзи кассирлар чек нусхасини чиқариб олиб, ўзи кешбэк тўплаяпти» — Шерзод Кудбиев
ДСҚ раиси ўзини алдаган дўкон кассири тўғрисида гапириб берди
Давлат солиқ қўмитаси раиси Шерзод Кудбиев 17 январь кунги матбуот анжуманида янги ишга туширилган кешбэклар тизими орқали баъзи дўконлар кассирлари ҳаридорлар кешбэкларини «олиб қўяётганини» маълум қилди. Бу ҳақда «Bugun.uz» мухбири ҳабар берди.
Шерзод Кудбиевнинг қайд этишича, кассирлар орасида чекнинг нусхасини чиқариб олиб, ҳаридордан аввал уни рўйхатдан ўтказиш ҳолатлари кузатилган.
Маълумот учун, кешбэк тизими Ўзбекистонда ҳаридорларнинг QR-кодли чекларини рўйхатдан ўтказиш орқали, уларга ҳарид суммасининг 1 фоизини қайтариб бериш учун қўлланилмоқда.
Тизимдан мақсад баъзи тадбиркорларнинг ўз айланма маблағларини солиқ органларидан яшириш мақсадида касса аппаратларини ишлатмасдан юритаётган фаолиятига чек қўйиш ҳисобланади.
ДСҚ берган маълумотларга кўра, шу кунгача кешбэк тизими орқали 37 минг 952 аҳолига 7 миллиард 12 миллион сўмдан ортиқ кешбэк ҳисобланган.
Эслатиб ўтамиз, ҳаридорларга ўз ҳаридининг 1 фоизини қайтариб беришни назарда тутувчи кешбэк тизими Ўзбекистонда 2022 йил 1 январдан амал қилишни бошлаган. Кешбэк олиш учун ҳаридор ўз чекини ДСҚнинг «Soliq» мобил дастурида рўйхатдан ўтказиши керак.
