Хайрли кеч, ушбу ўқиб турганингиз — «Бугун»нинг энг сара ва муҳим хабарлари жой олган «Бугун оқшоми» дайжести.

Бугунги дайжестни «шок хабар» билан бошлаймиз: қиш чилласининг ўртасида қор ёғиши мумкин!

«Ўзгидромед» маълумотларига кўра, Ўзбекистонда ҳафта давомида совуқ ҳаво кузатилади, унинг илк уч кунида эса ёмғир ёғиб, қорга айланиши мумкин.

Бекорга бу хабарни «шок» дея таърифламадик. Бу кетишда бўлса, яқин йиллар ичида қишда ҳам қор кўрмай қўямиз, айниқса, водий вилоятлари. Хай, нима бўлса ҳам, яхшилик(ка) бўлсин.

Энди эса ҳақиқий ҳавотирли хабар: Ўзбекистонда пандемия бошидан бери кунлик касалланишлар бўйича антирекорд қайд этилди.

Ўзбекистонда 16 январь куни коронавирус билан касалланиш рекорд даражага етди. Бир кеча-кундузда инфекцияси қайд этилганлар сони 1037 нафарни ташкил қилиб, умумий касалланганлар 206 минг 122 кишига етган. Кунлик аниқланаётган кейсларнинг ярмидан кўпи пойтахт ҳисобига тўғри келади.

Бу орада эса Ўзбекистонга яна 310 минг 50 доза «Pfizer/BioNTech» вакцинаси олиб келинди.

Андижон вилоятига янги прокурор тайинланди. Лавозимнинг бундан олдинги эгаси танқиддан сўнг қайтиб ишга чиқмаганди.

Сирожиддин  Эшпўлатов Андижон вилоятига прокурор этиб тайинланди. У тайинловга қадар Наманган вилояти прокурорининг ўринбосари лавозимида ишлаган.

Прокурорнинг тайинлов жараёнида Андижон вилояти ҳокими Шуҳрат Абдураҳмонов, Ўзбекистон бош прокурори Ниғматилла Йўлдошев иштирок этган.

Ўзбекистонда 2022 йил охиригача чартер рейс орқали сайёҳларни олиб келувчи авиаташувчилар харажатининг бир қисми қоплаб берилади.

Президентнинг тегишли фармонига мувофиқ, 2022 йил 1 январдан 2023 йил 1 январгача чартер рейс орқали сайёҳларни олиб келувчи авиаташувчилар харажатининг бир қисми қоплаб берилиши белгиланди. Бунда мамлакат ҳудудида камида 5 кеча тунаб қолган ҳар бир турист учун 10 доллар, қиш мавсумида (20 ноябрдан 20 февралгача) 25 долларгача давлат бюджети ҳисобидан тўлаб берилади.

Бошқа хабарлар пунктларда:

• Энди расман: «UzAuto Motors» ва бошқа мулклар акциялари очиқ савдога қўйилади. Бу бўйича Президент қарори имзоланди;
• Давлат солиқ қўмитаси раиси Шерзод Кудбиев хорижда меҳнат қилувчи ўзбекистонлик муҳожирларнинг даромадларини солиққа тортишга мутлақо қарши эканини айтди;
• Ўзбекистонда 100 ёшга кирган ва ундан ошган фуқаролар пенсиясига пенсияни ҳисоблашнинг базавий 100 фоизи миқдорида қўшимча пул тўланади;
• Тошкентдаги «Малика» савдо мажмуаси 125 миллиард сўмга сотилди. Вазирлик унинг олди-сотдисини рад этганди;
• «Ичувчилар» учун мақола. Маст ҳолда автомашина бошқариш учун жавобгарлик ҳақида батафсил;
• Тошкент аэропортида сўралаётган ҳам ПЗР, ҳам экспресс тест: қанчалик тўғри? Ҳуқуқ ва тиббиёт мутахассислари жавоб беради.

Самарқандда «Бир миллион дастурчи» ғолибига эски ноутбук берилди. Бунинг ортидан «замҳоким» ҳайфсан олди.

Самарқанд вилояти Нуробод туманида IТ мусобақасида ғолиб бўлган 13 ёшли мактаб ўқувчиси эски ноутбук берилгани юзасидан видеомурожаат йўллади.

Унда туманда жойлашган 41-умумтаълим мактабининг 8-синф ўқувчиси Саттаров Сардор «Бир миллион ўзбек дастурчилари» лойиҳасининг вилоят босқичида биринчи ўринни олишига қарамай, унга 3-даражали диплом ҳамда ишлатилган (эски) ноутбук берилгани айтилган.

Туман ҳокимлиги матбуот котиби бу бўйича маълумотни «Bugun.uz»га тасдиқлади. Қайд этилишича, IT танлови ғолибига эски ноутбук берилгани ортидан туман ҳокими ўринбосарига ҳайфсан берилган.

«‘Бир миллион дастурчи’ лойиҳаси доирасида ғолиб бўлган ёшларни тақдирлашда масъулиятсизликка йўл қўйгани учун туман ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Жалолиддинов Наврўз Шуҳрат ўғлига нисбатан Меҳнат кодексининг 181-моддаси билан ҳайфсан берилган», дейилади хабарда.

«Замҳоким»га ҳайфсан, йигитчага эса ғолиблик ва янги ноутбук муборак. Бундан-да катта зафарлар тилаймиз.

Хўш, оламда нима гап?

«Толибон»нинг таниқли ўзбек қўмондони Махдум Алам афғонларни ўғирлашда айбланиб ҳибсга олинган.

Маълум қилинишича, Махдум Алам афғонларни ўғирлашда айбланиб ҳибсга олинган. Ҳаракат расмийси Инамулла Самангоний ўзбек қўмондонига қарши тергов ҳаракатлари олиб борилаётгани, бир қатор гувоҳлар унга қарши кўрсатма берганини айтган.

Фарёбдаги вазият тўлиқ толиблар назоратида. Ҳибсга олинган қўмондоннинг баъзи тарафдорлари бундан норози. Улар ўзбек қўмондони этник асосда ҳибсга олинганини айтган ва қўмондон Афғонистон Ислом Амирлиги томонидан озод этилмаса, келажакда оммавий намойишлар бўлишидан огоҳлантирган. Фарёб ўзбеклари агар қўмондонни қўйиб юбормаса, Кобулдаги «Толибон»га бўйсунишни тўхтатишини айтган.

Қозоғистон чегарачилари мамлакатни тарк этаётган 29 ёшли Ўзбекистон фуқаросини қўлга олди.

Йигитнинг мобил телефонида 800 мегабайтдан ортиқ ҳажмдаги Чимкентдаги тартибсизликлар жойида олинган видеолар аниқланган. Шунингдек, Ўзбекистон фуқаросининг белида, эҳтимол, резина ўқлардан кўрилган ўқ жароҳати қайд этилган.

Бугун билан яшанг. «Бугун»да қолинг.