Украина собиқ президенти Пётр Порошенко Варшавадан 17 январь, душанба куни унга нисбатан давлатга хиёнат юзасидан бўлиб ўтадиган судда иштирок этиш учун Киевга учиб келди. Бу ҳақда «ТАСС» хабар берди.

Маълум қилинишича, Порошенко Киев аэропортида паспорт назоратидан муваффақиятли ўтган. Дастлаб унинг паспорти чегарачилар томонидан олиб кетилган, собиқ президент эса аэропортда узоқроқ ушлаб турилган. Шу билан бирга, Давлат тергов бюроси терговчилари айрим процессуал ҳаракатларни амалга ошириш учун Порошенкога мурожаат қилишга уринган. Бироқ охирида Украинанинг собиқ раҳбари паспортини олиб, терминал ҳудудига кирган.

Порошенко назоратдан ўтганидан сўнг журналистларга бўлиб ўтган воқеа чегарачилар уни мамлакатга киритмасликка ҳаракат қилганидан дарак беришини айтган. «Баъзилари чегарачилар ва баъзилари қора кийимда бўлган ҳуқуқ-тартибот идоралари ходимлари 15 дақиқа давомида ноқонуний равишда мени Украина ҳудудига киритмасликка ҳаракат қилди», — деган у. Собиқ давлат раҳбари буни расмийлар гўёки ундан қўрқиши, шунинг учун «хавфсизлик кучларига мухолифатга қарши курашиш бўйича буйруқ бериши» билан изоҳлаган. У бу хатти-ҳаракатини «қонун устуворлигини бузиш» деб атаган.

Шуниндек, Пётр Порошенко Украинага қайтганидан сўнг Киев аэропорти олдида ўз тарафдорлари олдида сўзга чиқиб, Украина президенти Владимир Зеленскийга қаршиларни бирлашишга чақирган.

«Биз Порошенкони ҳимоя қилиш учун эмас, бирлашиш ва Украинани ҳимоя қилиш учун келдик», — деган собиқ президент. Унинг қайд этишича, уни нафақат ўзининг «Европейская солидарность» партияси, балки Украинанинг амалдаги ҳукуматига қарши бўлган бошқа сиёсий кучлар ҳам қўллаб-қувватлайди.

«Бошқа сиёсий демократик кучлар вакилларининг биз билан бирга бўлиши жуда муҳим, бу бирлашувимиз рамзидир, чунки бирлашган Украина кучли эканини кўрсатишимиз керак», — деган Порошенко ва «кучли Украина» Россияга «қарши курашишга» қодирлигини айтган.

Порошенко ўз нутқида мамлакатнинг амалдаги ҳукумати вакиллари муносиб жазога тортилишига ваъда берган. Улар орасида у нафақат президент Зеленскийни, балки Порошенко ўзининг рақиби деб билган ва Украинанинг амалдаги раҳбарига таъсир ўтказганликда айблаётган тадбиркор Игорь Коломойскийни ҳам санаб ўтган. «Зеленскийлар ва Коломойскийлар, биз давлатимиз пойдеворини қураётганимизда, Украинани вайрон қилди, солиқ тўловчилар чўнтагидан ўнлаб миллион долларларни олиб чиқиб кетди, Лондон ва Италияда виллалар қурди. Ҳозир эса ҳокимиятда ўтириб, бизни ватанга хиёнатда айбламоқда. Бунинг учун уларнинг барчаси жавобгар»,—  деган Порошенко.

У амалдаги ҳукуматни 2014 йилда давлат тўнтариши ва тартибсизликлар натижасида ағдарилган, ташкилотчиларидан бири Порошенко бўлган собиқ президент Виктор Янукович маъмурияти билан солиштирган. «Бугун улар [ҳозирги Украина ҳукумати] ўзлари Януковичга айланиб, бизни [ўн йил орқага] орқага ташламоқда», — деган у. Ўз нутқидан сўнг собиқ президент аэропортдан Печерск судига кетган.

Киевнинг Печерский туман суди давлатга хиёнатда гумон қилинаётган Украинанинг собиқ президенти Пётр Порошенкони ҳибсга олиш масаласини кўриб чиқишни бошлаган. Украина Бош прокуратураси Порошенкони 1 миллиард гривна (тахминан 37 миллион доллар) гаров пули қўйиш имконияти билан ҳибсга олишни сўрамоқда. Айни пайтда суд биносида собиқ президентнинг бир неча минг тарафдорлари йиғилган.

Эслатиб ўтамиз, 20 декабрь куни Пётр Порошенко давлатга хиёнат қилиш ва террорчилик ташкилотларига ёрдам беришда гумон қилган. У Жанубий Африкадан кўмир етказиб бериш бўйича шартномаларни бузган ва назоратсиз Донбассдан кўмир етказиб беришни ташкил қилган. Шу билан бирга, бир гуруҳ Украина фуқаролари томонидан «ЛПР» ва «ДХР» террорчилик ташкилотларига умумий қиймати қарийб 1,5 миллиард гривнага ёрдам бериган. Порошенконинг адвокатлари Миллий хавфсизлик ва мудофаа кенгаши бешинчи президентга нисбатан санкциялар қўллаши мумкинлигини таъкидлаган.

Киевнинг Печерский туман суди 6 январь куни давлатга хиёнат қилиш ва терроризмга ёрдам беришда гумонланаётган бешинчи президент, халқ депутати Пётр Порошенконинг мол-мулки ва активларини расмийлаштирган.