Давлат хавфсизлик хизмати Андижон ва Наманганда жиноятчиларни 3 кило 860 грамм гашиш ва 1680 дона кучли таъсир қилувчи дори воситаси билан қўлга олди.

Маълум бўлишича, ДХХнинг Андижон вилояти бўйича бошқармаси чегара қўшинлари ҳарбий хизматчилари ҳамда вилоят ички ишлар бошқармаси ходимлари билан ҳамкорликда ўтказган тезкор тадбирида Андижон туманида яшовчи фуқаро Хўжаобод туманига бориб, қирғизистонлик наркокурьерлар томонидан давлат чегарасида улоқтириб ўтказиб берилган 3 килограмм 860 грамм гашиш моддасини олган вақтида ушланган.

Келтирилишича, вилоятда кузатилган яна бир ҳолатда муқаддам бир неча бор судланган фуқаро ёнида 110 дона флаконда кучли таъсир қилувчи дори воситаси борлиги аниқланиб, дорилар  процессуал тартибда расмийлаштириб олинган.

Шунингдек, Наманган вилояти бўйича Давлат хавфсизлик хизмати бошқармасининг Божхона қўмитаси ходимлари билан ўтказган тезкор тадбирида Тошкент шаҳри томон ҳаракатланиб кетаётган Наманган шаҳрида яшовчи фуқаро бошқарувидаги «Lасеtti» автомашинаси Қамчиқ довонида тўхтатилган.

Кузатув давомида аниқланишича, автомашинанинг салон қисмида ва юкхонасида 1680 дона флаконда кучли таъсир қилувчи дори воситаси бўлган. Мазкур дори воситалари Тошкент шаҳрида яшовчи муқаддам судланган фуқарога олиб кетилаётгани маълум бўлиб, у ҳам қўлга олинган. Ҳозирда мазкур ҳолатлар бўйича жиноят иши қўзғатилиб, тергов ҳаракатлари олиб борилмоқда.

Аввалроқ Давлат хавфсизлик хизмати ходимлари жойларда 25 килограмга яқин гиёҳванд моддалар муомаласига чек қўйганди.