Россия юқумли касалликлар шифокори, тиббиёт фанлари номзоди Андрей Поздняков коронавируснинг «омикрон» штами болалар учун нима сабабдан хавфли эканини айтди. Бу ҳақда «МИР 24» хабар берди.

Маълум қилинишича, ковиднинг бу штами бронхда осонликча кўпаяди ва ўпкага тезда зарар етказади. Катталар учун бу хавфли эмас, чунки улар учун бронхит пневмониядан фарқли ўлароқ, ҳалокатли касаллик эмас. Бироқ болаларда эса бу аксинча ҳисобланади.

Таъкидланишича, «омикрон» чақалоқларда жиддий оқибатларга олиб келиши мумкин ва айнан болаларнинг мазкур штамм билан касалхонага ётиш хавфи юқори. «Уларнинг анатомик ва функционал ёшига боғлиқ хусусиятлари туфайли вирус бронхитда кўпинча оғир асоратларга олиб келади», — дейди шифокор.

Мутахассис ўсиб бораётган болаларда бронхлар тўлиқ шаклланмаганини тушунтириб, бола қанчалик кичик бўлса, бронхларда хавф шунчалик юқори бўлишини айтган. Шунингдек, бронхиолит (пастки нафас йўлларининг ўткир вирусли инфекцияси бўлиб, у 24 ойгача бўлган чақалоқларга салбий таъсир қилади) кузатилиши юқорилигини қайд этган.

«Бу ҳолат оғир нафас етишмовчилиги билан кечиши ва ножўя оқибатларга олиб келиши мумкин», — дея қўшимча қилган Поздняков.

Аввалроқ Европада 5 ёшдан ошган болалар ковидга қарши эмланиши ва онанинг ковидга чалиниши чақалоқ саломатлигига қандай таъсир қилиши маълум бўлган.