Япониянинг Нагоя университети мутахассислари организмда «Collinsella» турига мансуб ичак бактерияси мавжудлиги ва коронавирус билан касалланганда ўлим даражаси пастлиги ўртасида эҳтимолий боғлиқлик борлигини аниқлади. Бу ҳақда «The Japan Times» хабар берди.

Тадқиқотчиларнинг фикрига кўра, «Collinsella» ўт кислоталарини урсодеоксихол кислотасига айлантира олади, бу эса коронавирус ва инфекцияланган одам ҳужайраларидаги рецепторлар ўртасидаги боғланишнинг олдини олади. Шунинг учун ичакда бундай бактерияларнинг кўплиги инфекция фаоллигини камайтириб, инфекция енгил аломатлари ва ўлимнинг паст эҳтимолини таъминлайди.

Ушбу назарияни текшириб кўриш учун олимлар касалланганлар орасида ўлим даражаси турлича бўлган мамлакатлардан 953 кишидан намуна олган. Натижалар шуни кўрсатдики, бу кўрсаткич нисбатан паст даражада бўлган Финляндия, Япония ва Корея Республикасида тадқиқот иштирокчиларининг 34–61 фоизининг ичагида «Collinsella»нинг катта концентрацияси топилган. Шу билан бирга, ўлим даражаси юқори бўлган АҚШ, Бельгия, Буюк Британия ва Италия аҳолиси орасида юқори концентрация фақат 4–18 фоизни ташкил қилган.

Қайд этилишича, тадқиқот натижалари «Collinsella» фаолияти ва ковид инфекциясининг олдини олиш ўртасидаги боғлиқликни кўрсатиши, шунингдек, турли мамлакат беморларидаги фарқли симптомларни тушунтириши мумкин.

Аввалроқ ковидга қарши кураша оладиган қон гуруҳлари аниқланганди. Шунингдек, олимлар коронавирус енгил кечишининг хавфли оқибатини маълум қилганди.