Қозоғистон президенти Қосим-Жўмарт Тўқаев мамлакатнинг биринчи президенти Нурсултон Назарбоевнинг жияни бўлган республика Миллий хавфсизлик қўмитаси раисининг биринчи ўринбосари Самат Абишни лавозимидан озод қилди. Бу ҳақда Тўқаев матбуот хизматига таяниб, «ТАСС» хабар берди.

Маълум қилинишича, аввалроқ Назарбоевнинг уч куёви лавозимидан четлатилган. Жумладан, кичик қизи Алия Назарбоеванинг турмуш ўртоғи Димаш Дўсанов «Казтрансойл» давлат компанияси бош директори лавозимини тарк этган.

Элбошининг ўртанча қизи Динаранинг эри Тимур Қулибоев «Атамекен» миллий тадбиркорлар палатаси президиуми раҳбарлигидан кетган. Назарбоевнинг тўнғич қизи Дариғанинг иккинчи турмуш ўртоғи Қайрат Шарипбоев «QazaqGaz» (собиқ «Казтрансойл») миллий компанияси бошқаруви раиси лавозимини муддатидан аввал тарк этган. Дариға Назарбоеванинг ўзи 12 январь куни парламент мажлисига келмаган. Унинг матбуот хизмати Дариға касаллик таътилида эканини айтган.

Аввалроқ Назарбоевнинг қизи отасини қўллаб-қувватлаган қозоғистонликларга мурожаат қилганди. Шунингдек, Назарбоевнинг қизи ва куёви намойишлар туфайли қанча пул йўқотгани айтилган.