Самарқанд вилояти ҳокими Эркин Турдимов қисқа муддатли меҳнат таътилини якунлаб, 17 январдан одатдаги тартибда иш фаолиятини бошлади. Бу ҳақда ҳокимлик матбуот хизмати «Bugun.uz»га маълум қилди.

Таъкидланишича, ҳоким 5 январдан 10 кунга расмий таътилни бошлаган. Вилоят ҳокимининг тегишли қарори билан 15 январга қадар унинг ваколатларини бажариш молия-иқтисодиёт ва камбағалликни қисқартириш масалалари бўйича биринчи ўринбосари Жамшид Ўроқов зиммасига юкланганди.

Ҳоким таътилда бўлган вақтида ижтимоий тармоқларда унинг инсультга чалиниб даволанаётгани ҳақида миш-мишлар тарқалган. Турдимовнинг Facebook’даги саҳифасида эса бундай маълумотлар ёлғонлиги, «ҳар хил гапларга ҳожат йўқ»лиги таъкидланган.

«Ассалому алайкум! Ҳурматли самарқандликлар! Ҳозир расман меҳнат таътилидаман. Самарқанд вилояти ҳокими вазифасини вақтинча бажариш биринчи ўринбосарим Ўроқов Жамшид Ражабович зиммасига юклатилган. Назаримда, ҳар хил гап-сўзларга ҳожат йўқ!» дейилганди хабарда.

Аввалроқ Шавкат Мирзиёев 5 январдан қисқа муддатли меҳнат таътилига чиққани, аммо Қозоғистондаги вазият сабаб уни 7 январь куни эрта якунлаб, ишга қайтгани маълум қилинганди.