Самарқанд вилояти Нуробод туманида IТ мусобақасида ғолиб бўлган 13 ёшли мактаб ўқувчисига эски ноутбук берилгани, бунинг ортидан туман «замҳокими» ҳайфсан олгани хабар қилинганди. IT-парк ахборот хизматининг маълум қилишича, ўқувчига янги ноутбук совға қилинди.

Хабарга кўра, 6–7 январь кунлари танловнинг шаҳар ва туман босқичлари ўтказилиб, унинг якунига кўра вилоят босқичига йўлланма олган ғолиблар аниқланган. Вилоят босқичида 180 нафар ўқувчи қатнашган. Ғолибларга ноутбук, иккинчи ўрин соҳибларига планшет, учинчи ўрин эгаларига эса мобил телефонлар совға қилинган.

Шу билан бирга, шаҳар ва вилоят босқичлари ғолибларини тақдирлаш маросими ҳам ўтказилиб, биринчи ўрин ғолибига ноутбук, иккинчи ўринга смартфон, учинчи ўринга эса электрон китоблар топширилган.

«Ижтимоий тармоқларда тарқалган видеолавҳада акс этган 15 ёшли Сардор Сатторов танловнинг туман босқичида ғолиб бўлиб, вилоят босқичига йўл олган, аммо совринли ўринни қўлга кирита олмаган. Ташкилотчилар томонидан йўл қўйилган хатолик туфайли унга ноутбук ўрнига смартфон совға қилинган.

Ушбу ҳолатга ойдинлик киритиш мақсадида вилоят ҳокимлигида матбуот анжумани ташкил этилиб, унда ҳокимлик вакиллари барча айбдорлар жазоланишини маълум қилди. Ахборот технологиялари ва коммуникацияларини ривожлантириш вазирлиги кўмагида IT-парк делегацияси ҳам ўз навбатида ушбу ёш, умидли бўлажак мутахассислар билан суҳбатлашиб, келгусида фаолиятларини қўллаб-қувватлаш мақсадида уларга Python дастурлаш тили ва IT учун инглиз тили бўйича бепул курслар тақдим этди», дейилади хабарда.

Бундан ташқари, уларга Coursera платформасида мавжуд махсус курсга бепул кириш имконияти берилиб, бренд совғалар улашилган.