Давлат солиқ қўмитаси раиси Шерзод Кудбиев солиқ имтиёзига эга йирик корхоналар бўйича журналистлар саволига жавоб берди, деб хабар бермоқда «Bugun.uz» мухбири.

ДСҚ раиси 17 январь куни ташкил этилган матбуот анжуманида «бой ва даромадли маҳаллий компаниялар», хусусан, «Artel» компанияси нега солиқ имтиёзларидан фойдаланиши, уларнинг юки иқтисодиётда қандай тақсимланиши ҳақида гапириб, имтиёз эгаларига тегишли барча маълумотларни очиқ айта олмаслигини билдирди. У ушбу гапларини солиқ сири важи билан изоҳлаган.

«Бу юк ҳеч кимнинг зиммасида эмас. Давлат ўзининг фискал-молия сиёсатини амалга оширмоқда. Қайсидир соҳаларни ривожлантириш керак, шу туфайли у ёки бу соҳаларга солиқ имтиёзлари тақдим этилади. Агар бу имтиёз берилган соҳаларни яшириб, беркитсак, бизни айбдор қилишингиз мумкин эди. Лекин биз имтиёз эгаларини очиқ эълон қиляпмиз», — дейди у.

Давлат солиқ хизмати органларининг бюджет тўғрисидаги қонунчилик ҳужжатларига мувофиқ очиқ маълумотларида солиқ имтиёзидан фойдаланувчи ташкилот ва корхоналар рўйхати келтирилган. Унда «UzAutoMotors» компанияси қўшилган қиймат солиғи ҳамда жисмоний шахсларнинг даромадлари солиғидан озод этилгани акс этган. Шунингдек, «Artel»га тегишли бир нечта компаниялар турли солиқ имтиёзларидан фойдаланиши ҳам келтирилган.

Молия вазири ўринбосари Дилшод Султоновнинг айтишича, қисқа муддатда республикадаги барча солиқ имтиёзи эгалари оммага очиқ эълон қилинади ҳамда маълумотлар тез фурсатда янгиланади.

ДСҚ раисига кўра, ўтган ҳисобот йилида 1190 триллион сўмлик айланма амалиёти кузатилган. Шунинг 17 фоизи (202 триллион сўм) 0 даражадаги ставкада, 13 фоизи (154 триллион сўм) имтиёзли товарлар айланмаси бўлган, яъни фармацевтика ва бошқалар. Солиққа тортиладиган айланма эса 833 триллион сўмни ташкил этган. Шундан тўловга ҳисобланган қўшилган қиймат солиғи 125 триллион сўм, ҳисобга олиш учун кўрсатилган сумма эса 105 триллион сўм бўлган.

«Солиқ имтиёзлари муаммодир, лекин асосий масала — ҳисобга олишни жиловлаш», дея фикрини якунлаган у.