Афғонистонда «Толибон»нинг таниқли ўзбек қўмондони Махдум Алам ҳибсга олингани сабабли ўзбек ва пуштун толиблари ўртасида зиддият юзага келганди. Ислом амирлиги қўмондоннинг ҳибсга олиниши сабабини очиқлади.

Маълум қилинишича, Махдум Алам афғонларни ўғирлашда айбланиб ҳибсга олинган. Ҳаракат расмийси Инамулла Самангоний ўзбек қўмондонига қарши тергов ҳаракатлари олиб борилаётгани, бир қатор гувоҳлар унга қарши кўрсатма берганини айтган.

«Ҳозир Алами Кобулга етказилди, чунки унинг ишини кўриб чиқувчи ваколатли орган Афғонистон пойтахтида жойлашган», — дейди у.

Таъкидланишича, Фарёбдаги вазият тўлиқ толиблар назоратида. Ҳибсга олинган қўмондоннинг баъзи тарафдорлари бундан норози. Улар ўзбек қўмондони этник асосда ҳибсга олинганини айтган ва қўмондон Афғонистон Ислом Амирлиги томонидан озод этилмаса, келажакда оммавий намойишлар бўлишидан огоҳлантирган. Фарёб ўзбеклари агар қўмондонни қўйиб юбормаса, Кобулдаги «Толибон»га бўйсунишни тўхтатишини айтган.

Аввалроқ «Толибон» Ўзбекистонни афғон самолёт ва вертолётларини қайтаришга чақиргани ва «Толибон» ҳаракати Ўзбекистон билан чегарадош вилоятга махсус кучларни жойлаштиргани хабар қилинган.