Тошкент шаҳрида 16 январь куни «Cobalt» ҳайдовчиси бошқарувни йўқотиб, бетон тўсиққа урилиши оқибатида ҳалок бўлди. Бу ҳақда шаҳар Ички ишлар бош бошқармаси ахборот хизмати хабар берди.

Маълум бўлишича, Юнусобод туманида 16 январь куни соат 23:43 да 102 хизматига тушган хабарга кўра, соат 23:00 атрофида ТХАЙ кўчасида ҳайдовчи А.А. ўзига тегишли бўлган «Cobalt» автомобилида бошқарувни йўқотиб, бетон тўсиққа урилган.

Таъкидланишича, ҳайдовчи А.А. олган тан жароҳати натижасида воқеа жойида вафот этган, ушбу автомобилда йўловчи сифатида кетаётган А.У. чап оёқ болдир бўғими синиши ташхиси билан шифохонага ётқизилган.

Мазкур ҳолат бўйича Жиноят кодексининг 266-моддаси (Транспорт воситалари ҳаракати ёки улардан фойдаланиш хавфсизлиги қоидаларини бузиш) 2-қисми бўйича жиноят иши қўзғатилган.

Аввалроқ Жиззахда бетон тўсиққа урилган «Nexia» ёниб кетгани ҳамда Қашқадарёдаги ЙТҲда 5 киши ҳалок бўлгани хабар қилинганди.