Тошкентдаги «Малика» савдо мажмуаси 250 та янги иш ўринларини яратиш шарти билан сотилди. Бу ҳақда Давлат активларини бошқариш агентлиги хабар берди.

Маълумотларга кўра, давлат тендер комиссиясининг тегишли қарорига мувофиқ қуйидаги давлат кўчмас мулк объектларининг оммавий савдо жараёнлари ғолиблари белгиланди:

«Пойтахт бизнес мажмуаси» МЧЖ мулкий мажмуаси бўйича савдоларда «Quadro IH DMCC» (БАА) компанияси 164,0 миллиард сўм харид қийматини бир йўла тўлаш ҳамда таъмирлаш-тиклаш ишлари учун 6,0 миллион АҚШ долларидан кам бўлмаган миқдорда инвестиция киритиш шарти билан;

«Малика» савдо ва маиший хизмат кўрсатиш мажмуаси бўйича савдоларда «Premium Prime Service» МЧЖ 125,0 миллиард сўм харид қийматини бир йўла тўлаш ҳамда таъмирлаш-тиклаш ишлари учун 100,0 миллиард сўм миқдорида инвестиция киритиш ва 250 та янги иш ўринини яратиш шарти билан;

«Белдерсой оромгоҳи» дам олиш маскани (Канат йўли билан бирга) бўйича савдоларда «Ulkan Mulk» МЧЖ 107,0 миллиард сўм харид қийматини бир йўла тўлаш шарти билан савдо ғолиби деб топилган.

Таъкидланишича, Президентнинг 2020 йил 27 августдаги фармони талабларига кўра, «Чорвоқ» туристик-рекреацион зонаси дирекцияси ҳудудида амалга ошириладиган лойиҳалар ушбу дирекция билан келишилган ҳолда амалга оширилади. Бу ерда «Белдерсой оромгоҳи» дам олиш маскани жойлашган.

Аввалроқ Тошкент шаҳридаги «Малика» бозори 125 миллиард сўмга сотилгани ҳақида хабарлар тарқалган эди. Шундан сўнг Иқтисодий тараққиёт ва камбағалликни қисқартириш вазирлиги ушбу хабарни рад этган.

Навбатдаги сотувда Тошкентдаги «Premier Hall» кино зали, Геология қўмитаси тизимидаги собиқ бино, «Андижон ёғ-мой» АЖ ва «Чорвоқ» оромгоҳи мавжуд.