Андижондаги туғуруқхонада 12 туп соғлом дарахт кесиб ташлангани хабар қилинганди. Ҳолат юзасидан шаҳар ободонлаштириш бошқармаси бошлиғи Ғ.Ш.га нисбатан жиноят иши қўзғатилди, деб хабар бермоқда Бош прокуратура матбуот хизмати.

Маълум бўлишича, мазкур ҳолат ишчи гуруҳ томонидан ўрганилган. Таъкидланишича, Президентнинг 2021 йил 30 декабрдаги «Республика кўкаламзорлаштириш ишларини жадаллаштириш, дарахтлар муҳофазасини янада самарали ташкил этиш чора-тадбирлари тўғрисида»ги фармони билан давлат ўрмон фондига кирмайдиган дарахтлар ва буталар қимматбаҳо навларининг кесилишига мораторийнинг амал қилиши муддатсиз даврга узайтирилган.

Шунга қарамасдан, Андижон шаҳар ободонлаштириш бошқармаси бошлиғи Ғ.Ш. томонидан вилоят перинатал маркази ҳудудидаги элдор қарағайи (Pinus eldarica) навли 12 туп дарахт қонунга хилоф равишда кесиб юборилгани оқибатида табиатга 115,5 миллион сўм миқдорида зарар етказилган.

Ўтказилган текшириш натижасига кўра, Андижон шаҳар ободонлаштириш бошқармаси бошлиғи Ғ.Ш.га нисбатан Жиноят кодексининг 198-моддаси (экинзорларни, ўрмонларни, дарахтларни ёки бошқа ўсимликларни шикастлантириш ёхуд нобуд қилиш) 2-қисми билан жиноят иши қўзғатилган. Тергов ҳаракатлари олиб борилмоқда.

Аввалроқ Тошкентда соғлом дарахтлар кесилиб, ўтин қилинаётгани айтилганди. Шунингдек, Фарғонадаги мактабда 2 туп қимматбаҳо чинор ноқонуний тарзда кесиб ташланган.