Андижонда «Ҳизб ут-Таҳрир» ғоялари бўйича сабоқ олиб келаётган 12 нафар аёл ушланди
Андижон вилоятида «Ҳизб ут-Таҳрир» диний экстремистик ташкилоти фаолиятини тарғиб қилувчи диний ўқишхонлик қилиб келаётганлар аниқланди. Бу ҳақда вилоят Ички ишлар бошқармаси ахборот хизмати хабар берди.
Маълум қилинишича, 16 январь куни олинган тезкор маълумотга асосан ДХХ Андижон вилояти бошқармаси ва вилоят ИИБ ТЭҚКБ ҳамда Андижон тумани ИИБ ходимлари томонидан ҳамкорликда тезкор тадбир ўтказилган. Жараён давомида «Ҳизб ут-Таҳрир» диний экстремистик ташкилотининг «Аёллар қаноти» гуруҳи аъзолари бўлган 12 нафар аёл Андижон туманида яшовчи фуқаро М.М.нинг хонадонида тўпланиб, диний экстремистик ташкилот фаолиятини тарғиб қилувчи диний ўқишхонлик қилиб келаётгани аниқланган.
Олиб борилган тезкор суриштирув тадбирлари давомида аёллар ҳозирда Туркия давлатида бўлган, 1972 йилда туғилган аёл М.Х.нинг кўрсатмаси асосида тез-тез бир-бирларининг хонадонларида зиёфат баҳонасида йиғилиб, М.Х.дан ижтимоий тармоқлар орқали экстремистик ташкилот ғоялари бўйича сабоқ олиб келаётгани аниқланган. Ҳозирда мазкур ҳолат юзасидан терговга қадар текширув ишлари олиб борилмоқда.
Аввалроқ Самарқандда «Ҳизб ут-Таҳрир» ва «Жиҳодчилар» экстремистик оқимлари тарғибчилари ушлангани ҳақида хабар берилганди.
