Олимлар коронавирус инфекцияси кекса одамларда Альцгеймерга қараганда мияга кўпроқ зарар етказишини аниқлади. Бу ҳақда «Daily Mail» хабар берди.

Маълум қилинишича, Альцгеймерга қарши курашиш ассоциацияси тадқиқотчилари буни аниқлаш учун ковид ва Альцгеймерга чалинган беморларни кузатган. Олимлар когнитив (ҳис қилиш) функциялари пасайган ёки инфекция туфайли деменция (бош миянинг зарарланиши оқибатида юзага келади ва ақлий қобилият сезиларли даражада пасаяди) ривожланган ковидга чалинган беморларга эътибор берган.

Таъкидланишича, коронавирусни юқтиришдан олдин улар мия касалликларидан азият чекмаган. Уларни Альцгеймер билан касалланган беморлар билан солиштирганда, коронавирус мияга кўпроқ зарар етказиши маълум бўлган. Мазкур хавф гуруҳига ковиднинг оғир шакли билан касалланган беморлар киритилган. Мутахассислар мия фаолиятини тиклаш мумкинлиги, лекин бу узоқ вақт талаб қилишини хулоса қилган.

Маълумот учун, Альцгеймер — деманснинг энг кенг тарқалган тури, миянинг тўғри ишлашини тўхтатадиган ҳолат. Бу касаллик хотира, фикрлаш ва хатти-ҳаракатлар билан боғлиқ муаммоларни келтириб чиқаради.

Аввалроқ коронавирус мия фаолиятига қандай зарар етказиши маълум қилинганди. Шунингдек, ковид кўз фаолиятига қандай зарар етказиши хабар берилган.