Навоий шаҳрида 2021 йил 4 август куни акасини кетмон билан уриб ўлдирган эркак 5 йилга қамалди.

Маълум қилинишича, 2021 йил 7 декабрь куни жиноят ишлари бўйича Хатирчи туман суди биносида ўтказилган очиқ суд мажлисида ўз акасининг ўлимига сабабчи бўлган 1990 йилда туғилган Ш.О.га нисбатан жиноят иши кўриб чиқилган.

Аниқланишича, Ш.О. 2021 йил 4 август куни Навоий шаҳри Ёшлик маҳалла фуқаролар йиғини ҳудудида «Шоҳжаҳон Шамшири» масъулияти чекланган жамияти томонидан олиб борилаётган қурилиш объектининг 3-қаватида акаси Э.О. билан бирга овқатланган. Улар спиртли ичимлик истеъмол қилган. Маст ҳолатда иш ҳақи масаласида акаси Э.О. билан ўрталарида ўзаро келишмовчилик келиб чиққан. Жанжал оқибатида Ш.О. акасининг бош қисмига шу ерда турган кетмон дастаси билан бир маротаба уриб, унга тан жароҳати етказган.

Э.О. республика шошилинч тез ёрдам илмий маркази вилоят филиалига ётқизилиб, кўрсатилган тиббий муолажаларга қарамасдан, 9 август куни касалхонанинг жонлантириш бўлимида вафот этган.

Суд-тиббий экспертиза илмий-амалий маркази Навоий филиалининг 17 августдаги 137-сонли хулосасида марҳум Э.О.нинг танасида ҳаёт учун хавфли бўлган оғир тан жароҳатлари мавжудлиги ва бу жароҳатлар унинг ўлими сабаби билан бевосита боғлиқ экани кўрсатилган.

Суд Ш.О.ни содир этган жиноятининг хусусияти ва ижтимоий хавфлилик даражаси, муқаддам судланмагани, айбига тўлиқ иқрорлиги, қонуний вакилнинг даъвоси йўқлиги, қилмишидан пушаймонлиги, оилавий шароитини инобатга олиб, Жиноят кодекси 104-моддаси 3-қисми «д» банди (Жабрланувчининг ўлишига сабаб бўлган қасддан баданга оғир шикаст етказиш), кодекснинг 57-моддасини қўллаб, 5 йилга озодликдан маҳрум қилиш жазоси тайинланган.

Аввалроқ Самарқандда эркак амакисини кетмон билан уриб ўлдиргани ҳақида хабар берилганди. Шунингдек, Сурхондарёда эркак сув талашиб, фуқаронинг бошига кетмон билан урган.