Сирдарё вилоятида туман ҳокимлиги масъуллари ва давлат ташкилотлари раҳбарлари ресторанда ярим-яланғоч раққоса қизлар билан овқатлангани ҳамда улар ишдан олингани хабар қилинганди. Вилоят ҳокимлигининг «Bugun.uz»га маълум қилишича, ишдан кетган Сирдарё тумани Ободонлаштириш бошқармаси бошлиғи Нозим Муродов синов муддати билан вазифасига тикланган.

Ҳолат Сирдарё туманидаги «Евро Азия» ресторанида юзага келган. Ишдан ташқари вақтда ресторанга овқатланиш учун борган масъуллар туман ҳокими ўринбосари (ўша вақтда туман ҳокими ёрдамчиси) туман Ободонлаштириш бошқармаси бошлиғи, Экология ва атроф-муҳитни муҳофаза қилиш соҳасидаги назорат бўйича туман инспекцияси бош мутахассис-давлат инспектори, «Сувоқова» давлат унитар корхонаси раҳбари ҳамда туманнинг Йўллардан фойдаланиш унитар корхонаси раҳбарлари бўлган.

Қайд этилишича, Сирдарё тумани ҳокимининг қарори билан Нозим Муродов Ободонлаштириш бошқармаси бошлиғи лавозимига тайинланган. Ҳужжатга кўра, у икки ойлик синов муддати билан лавозимига тикланган.

Маълумот учун, Сирдарё тумани Ободонлаштириш бошқармаси бошлиғи Нозим Муродов 2021 йил 14 июнь кунидан ўз аризасига асосан эгаллаб турган лавозимидан озод этилган ва у билан тузилган меҳнат шартномаси бекор қилинганди.