Тошкент вилояти Оҳангарон туманида 17 январь куни «Howo» юк автомобили йўл четига ағдарилиб кетди. Бу ҳақда вилоят Йўл ҳаракати хавфсизлиги бошқармаси ахборот хизмати хабар берди.

Маълум қилинишича, ҳолат туман ҳудудидан ўтган автомобиль йўлининг 194-километрида содир бўлган. Ҳайдовчи 1991 йилда туғилган Н.Э. (Ангрен шаҳрида яшовчи ) «Howo» русумли юк автомобилини Наманган–Тошкент йўналиши бўйлаб бошқариб кетаётиб, руль бошқарувини эплай олмай, йўлнинг ўнг четига ағдарилиб кетган.

Ҳодиса оқибатида тан жароҳати олганлар йўқ. Автомобилга техник шикаст етган. «Ҳайдовчилардан йўлларда эътиборли бўлиб, қоидаларга риоя қилишини сўраймиз», дейилади хабарда.

Аввалроқ Тошкент вилоятида юк машинаси ағдарилиши оқибатида 2 автомобилга шикаст етгани хабар қилинганди. Шунингдек, Қашқадарёда қум ортилган юк машинаси ағдарилиб кетган.