Тошкент шаҳри Яккасарой туманида 18 январь куни фаолияти тўхтатилган кафеда ёнғин содир бўлди. Бу ҳақда Фавқулодда вазиятлар вазирлиги ахборот хизмати хабар берди.

Маълум бўлишича, ёнғин соат 18:08 да Бешёғоч кўчасида жойлашган кафеда ёнғин содир бўлаётгани тўғрисида шаҳар ФВБга хабар келиб тушган. Шунга кўра, 4 та ёнғин-қутқарув экипажи воқеа жойига соат 18:15 да етиб бориб, ёнғин соат 18:30 да қуршаб олинган ва соат 18:33 да бартараф этилган.

Ёнғин оқибатида бино ичидаги тахминан 50 квадрат метр майдонда чиқиндилар ёнган. Ҳодисада жабрланган ва ҳалок бўлганлар йўқ. Ҳозирда ёнғиннинг келиб чиқиш сабаби ва моддий зарар миқдори аниқланмоқда.

Аввалроқ Тошкентдаги дўконлардан бирида ёнғин содир бўлгани ҳақида хабар берилганди.