Коронавирус сабаб Бирлашган Араб Амирликларига кириш учун янги талаблар қўйилди. Бу ҳақда «Uzbekistan Airways» ахборот хизмати маълум қилди.

Таъкидланишича, 17 январдан бошлаб Ўзбекистон ва Тожикистондан БААга бораётганлар учун мажбурий:

• парвоздан 48 соат кўп бўлмаган, ковидга қарши ПЗР усулида топширилган тестнинг салбий натижасини тақдим этиши;
• Дубай/Шаржа аэропортларига келиши билан ПЗР тестини топшириши;
• тест натижасини олгунга қадар изоляцияда бўлиши керак.

Аввалроқ Миграция агентлиги Кореяга бормоқчи бўлган фуқароларга мурожаат қилганди. Таъкидланишича, фуқаролар Корея томонидан тан олинган вакцина билан эмлангани ҳамда кетишдан 72 соат олдин олинган ПЗР тести натижасига кўра, ковид инфекцияси аниқланмаганига қарамасдан, Корея ҳудудида кириб борган ўзбекистонликларда коронавирус инфекцияси қайд этилган.

Шунингдек, 2021 йил 23–30 декабрь кунлари жўнаб кетган фуқароларнинг 1 нафарида, 2022 йилнинг 6 январида жўнаб кетган 98 нафар фуқаронинг 6 нафарида коронавирус аниқлангани сабабли Корея ҳукумати томонидан Ўзбекистон учун ушбу давлатга кириб борувчи фуқаролар сони қисқариши, ҳаттоки вақтинчалик тўхтатилиши каби чекловлар қўйилиши мумкинлиги тўғрисида огоҳлантирилган.