Фарғона шаҳрида 18 январь куни 6 кило 90 грамм вазндаги чақалоқ туғилди. Бу ҳақда вилоят Соғлиқни сақлаш бошқармаси ахборот хизмати «Bugun.uz»га хабар берди.

Маълум бўлишича, фарғоналик Мавлуда Хўжаева шаҳар тиббиёт бирлашмаси туғруқ бўлимида вазни 6 килограмм 90 грамм, бўйи 60 сантиметр бўлган ўғил чақалоқни дунёга келтирган. Таъкидланишича, бола 39 ҳафталик бўлиб, жарроҳлик амалиёти ёрдамида туғилган.

Қайд этилишича, чақалоқ туғуруқ бўлимида туғилган энг оғир бола ҳисобланади. Маълумот учун, мазкур туғуруқ комплексида охирги марта энг оғир вазнли чақалоқ 5 килограмм туғилган.

Аввалроқ Россиядан Ўзбекистонга учган самолёт бортида чақалоқ туғилгани хабар қилинганди. Шунингдек, Тошкент вилоятида 3 нафар эгизак туғилган ҳамда уларга Миршавкат, Мирзиё ва Миромон исмлари қўйилганди.