Янгиликлар - 21:37 · 19.01.2022

Киев суди давлатга хиёнатда айбланган Порошенкони ҳибсга олмади

Киевнинг Печерск туман суди Украина собиқ президенти Пётр Порошенкога нисбатан давлатга хиёнат иши бўйича суд ва ҳуқуқ-тартибот идораларида иштирок этиш учун шахсий мажбурият кўринишидаги эҳтиёт чорасини тайинлади. Бу ҳақда «ТАСС» хабар берди.

Фото: «РИА Новости»

Маълум қилинишича, тегишли қарор 19 январь, чоршанба кунги суд йиғилишда қабул қилинган. Суд Порошенкога нисбатан шахсий мажбурият тарзида эҳтиёт чорасини тайинлаб, ундан паспортини топширишни буюрган. Прокуратуранинг Украина собиқ раҳбарини ҳибсга олиш ёки уни 35,8 миллион доллар гаров эвазига озод қилиш ҳақидаги илтимоси рад этилган.

«Суд Порошенкога шахсий мажбурият кўринишидаги эҳтиёт чорасини қўллади», — дейди судья Алексей Цоколов.

Суд мажлисида Европанинг кенгайиш ва қўшничилик сиёсати бўйича собиқ комиссари Штефан Фюле иштирок этган. Суд қарорининг эълон қилиниши Порошенко тарафдорларининг митинги билан бирга кечган, унда бир неча минг киши қатнашган. Порошенконинг адвокати Игорь Голованнинг қўшимча қилишича, суд сиёсатчига терговчи рухсатисиз Киевни тарк этишни тақиқлаган, шунингдек, унинг чет элга чиқмаслиги учун паспортларини топширишни буюрган.

Қарор эълон қилинганидан кейин бинони тарк этган сиёсатчи ғалабани нишонлашга ҳали эрта экани, чунки «Зеленскийнинг ақлдан озган сценарийси ҳали тугамаганини» айтган. У суд қарори сиёсий фаолиятига тўсқинлик қилаётганини таъкидлаган.

Маълумот учун, декабрь ойи ўрталаридан бери Порошенко дипломатик сафарда хорижда бўлиб, у ердан 17 январь куни қайтиб келган. Унинг йўқлигида суд Порошенконинг барча мол-мулкини мусодара қилган, собиқ президент Донбассдан кўмир етказиб бериш бўйича давлатга хиёнат ва терроризмга ёрдам беришда гумон қилинмоқда. Унга 15 йиллик қамоқ жазоси тайинланиши кутилмоқда.

Аввалроқ Украинада намойишчилар собиқ президент Порошенконинг вилласига бостириб киришга уринганди.