Америкалик олимлар томонидан 6 январда кашф этилган «2022 AE1» астероиди 2023 йил ёзида Ер билан тўқнашиши мумкин. Бу ҳақда NASA’нинг Ерга яқин объектларни ўрганиш маркази хабар берди.

Маълум қилинишича, астероид Аризона штатидаги Маунт-Леммон расадхонасида аниқланган. Олимларнинг фикрига кўра, унинг Ерга яқин бўлган бошқа барча жисмлар орасида Ер билан тўқнашув хавфи энг юқори ҳисобланади. Астероиднинг диаметри 70 метр бўлиб, у соатига 19,83  километр тезликда ҳаракатланади. Объектни катта телескоплар ёрдамида кузатиш мумкин.

Таъкидланишича, ҳозирча 10 балллик Турин шкаласи бўйича астероид 1 балл олган. 10 балл билан астероид тўқнашуви муқаррар деб баҳоланади. Олимлар тўқнашув эҳтимолини 1700 дан бир ҳолатда деб ҳисобламоқда.

Аввалроқ Ерга январь ойида 2 та астероид яқинлашиши ва 2022 йилда кузатиладиган астрономик ҳодисалар маълум қилинганди.