Иситма туширувчи ва вирусга қарши препаратлар, шунингдек, кўп миқдорда сув ичиш «омикрон»нинг дастлабки белгилари аниқланганда даволанишга ёрдам беради. Бу ҳақда «Известия» хабар берди.

Келтирилишича, Москва Cоғлиқни сақлаш бошқармаси бош юқумли касалликлар бўйича мутахассиси Светлана Сметанина бу ҳақда маълумот берган. «Деярли ҳар бир уйда биринчи тиббий ёрдам тўпламида касалликнинг кечишини енгиллаштирадиган рецептсиз дори воситалари мавжуд. Касалликнинг бошланиши, қоида тариқасида, интоксикация (бу токсик моддалар тўқималарга кирганда пайдо бўладиган, шунингдек, тўқималарнинг ўзида ишлаб чиқарилган аломат), юқори иситма, бош оғриғи ва мушаклардаги оғриқлар билан кечади», — деган Сметанина.

Мутахассис агар вирус аниқланса, кунига камида 2 литр суюқлик ичиш, тана ҳароратини кунига уч марта ўлчаш ва иситма туширувчи дориларни қабул қилиш кераклигини қайд этган.

Томоқ оғриғининг ноқулайлигини камайтириш учун микробларга қарши ва яллиғланишга қарши хусусиятларга эга дорилардан фойдаланиш, таркибида ўт ва хлорогексидин бўлган суюқлик билан томоқни чайқаш айтилган.

Таъкидланишича, юқори ҳарорат уч кундан ортиқ давом этса ва дорилар иситмани камайтирмаса, шифокор билан маслаҳатлашиш тавсия этилади.

Аввалроқ ЖССТ коронавирусни даволаш учун иккита янги дорини тасдиқлаганди. Шунингдек, ковидни даволаш усулларидан бири самарасиз деб топилганди.