Пентагон Ўзбекистондаги афғон самолёт ва вертолётлари «Толибон»га қайтарилмаслигини маълум қилди
Пентагон матбуот котиби Жон Кирби 18 январь куни афғон учувчилари Ўзбекистон ва Тожикистонга олиб ўтган ҳарбий техникалар «Толибон»га қайтарилмаслигини маълум қилди.
Таъкидланишича, 2021 йил августда АҚШ Афғонистонни тарк этганда афғон учувчилари мамлакат ҳарбий-ҳаво кучларига тегишли бўлган самолётда ўзини ва оиласини Ўзбекистон ва Тожикистонга олиб кетган. Улар орасида АҚШ томонидан тақдим этилган самолёт ва вертолётлар ҳам бўлган. Кирбининг таъкидлашича, ҳозирда «Толибон» техникаларни қайтаришни сўрамоқда, бироқ Пентагон расмийси бу талаб АҚШ самолёт ва вертолётларига ўтмаслигини айтган.
«Биз ҳали ҳам бу техникаларни жойлаштириш бўйича режа ишлаб чиқмоқдамиз. Менда улар бўйича қабул қилинган қарор, уларнинг бошқарилиши бўйича янги маълумотлар йўқ. Бироқ техника Афғонистонга ‘Толибон’ фойдаланиши учун юборилмаслигини ишонч билан тахмин қила оламан», — деган у.
Кирбининг сўзларига кўра, Мудофаа вазирлиги ушбу самолёт ва вертолётлар билан нима содир бўлиши ҳақидаги якуний қарор чиқариш устида ишламоқда. Ҳозирда «Толибон» АҚШ томонидан Афғонистоннинг расмий ҳукумати сифатида тан олмайди, бироқ Кирби бундай қарорлар Мудофаа вазирлиги ваколатига кирмаслигини айтган. «Биз Афғонистонда инсон ва фуқаролик ҳуқуқларини, ‘Толибонʼ амалда бажарган ваъдаларни кўришни хоҳлаймиз», — деган у.
Пентагон матбуот котиби, шунингдек, Мудофаа вазирлигининг вазифаси Қўшма Штатларни, жумладан, Афғонистондан келиб чиқиши мумкин бўлган ҳар қандай терроризм таҳдидларидан ҳимоя қилишни давом эттириш эканини айтган.
«У ерда нима бўлаётганини кузатиб борамиз. Бизда терроризмга қарши жиддий, муҳим масъулият бор. Ўзимиз фойдаланишимиз мумкин бўлган юқори имкониятларга эгамиз. Биз Афғонистон ҳужум қилиш учун хавфсиз бошпана бўлиб хизмат қилмаслигига ишонч ҳосил қилишда давом этамиз», — дейди расмий.
Эслатиб ўтамиз, «Толибон» ҳаракати Тожикистон ва Ўзбекистон расмийларини афғонистонликлар олиб ўтган самолёт ва вертолётларни қайтаришга чақирганди. Шу билан бирга, ҳаракат расмийси мазкур чақириқ қардош давлатлар билан муносабатларга таъсир қилмаслигини таъкидлаган.
