Қозоғистон махсус хизматлари мамлакатдаги тартибсизликларда радикал ва экстремистик ташкилотлар аъзолари иштирок этганини аниқлади. Бу ҳақда давлат котиби Ерлан Каринга таяниб, «Tengrinews» хабар берди.

Маълум қилинишича, Қозоғистон ҳудудига 20 декабрь куни бир вақтнинг ўзида бир гуруҳ чет эл фуқароларининг келиши қайд этилган, улар 7–8 январь кунлари турли йўналишда мамлакатни тарк этишга уринган. «Махсус хизматлар томонидан мамлакат ичида фаолият юритган бир қатор радикал ва экстремистик ташкилотлар аъзоларининг яқинда содир бўлган воқеаларда иштирок этиш фактлари аниқланган», — деган давлат котиби.

Шунингдек, у хорижий террорчи ташкилотлардаги қозоқ радикаллари ушбу воқеалар ортидан янги ҳужум уюштиришга урингани, бу махсус хизматлар томонидан ўз вақтида бостирилганини айтган.

«Суд томонидан тан олинган экстремистик ташкилотлардан бири бу намойишлар, тартибсизликлар, очиқдан-очиқ зўравонлик ҳаракатларини қўзғатган, хусусан, маъмурий биноларни эгаллаб олган», — деган Карин.

Унинг сўзларига кўра, айнан шу ташкилотнинг чатлари орқали биноларни эгаллаб олиш, йўлларни тўсиш бўйича кўрсатмалар тарқатилган. Давлат котибининг қайд этишича, улар Қозоғистон жамиятига радикал мафкурани киритишга ҳаракат қилмоқда.

«Жамиятимизга радикал мафкураларни, хулқ-атвор йўналишини олиб киришга уринишларни кўрмоқдамиз. Шунинг учун ҳам умумий вазифа шундай радикал мафкурага тўсқинлик қилишдир. Экстремистик қарашларга қарши тубдан курашишимиз керак. Жамиятимизга зўравонлик ҳаракатлари содир бўлмоқда», — деган у.

Аввалроқ Қозоғистондаги тартибсизликларда қанча одам ўлгани очиқланганди. Шунингдек, мамлакат чегарачилари ўзбекистонлик эркакни қўлга олгани ва у Ўзбекистон фуқароси экани рад этилгани маълум қилинган.