Ўзбекистонда 19 январдан «Lacetti» ва «Cobalt» автомашиналари магнитоласиз етказиб берилади. Бу ҳақда «UzAuto Motors» АЖ ахборот хизмати хабар берди.

Маълум бўлишича, Корея ишлаб чиқарувчиси автомагнитолани етказиб беришни номаълум муддатга тўхтатгани ҳақида расмий хат билан мурожаат қилган.

«Пандемия сабаб яримўтказгичларга талаб кескин ортди. Бу эса, ўз навбатида, ҳозирги интеграл микросхемаларнинг етишмовчилигига олиб келди. ‘UzAuto Motors’ талабини бажариш учун биз имкон қадар ҳамма нарсани қиляпмиз. Бироқ биз бу глобал вазиятни, муаммони ўзимиз ҳал қила олмаймиз.

Интеграл микросхемалар танқислиги натижасида юзага келган инқирознинг зарарини минималлаштириш учун ‘Humax Automotive’ компаниясининг барча ходимлари ушбу вазиятни яхшилаш ҳамда хабардорликни ошириш учун кундалик ишларга жалб қилинган. Биз барча мавжуд воситалар ва ресурслардан ечим излаяпмиз», дейилади хабарда.

Таъкидланишича, аввал тузилган шартномалар бўйича «Lacetti» ва «Cobalt» автомобиллари «Humax» компанияси томонидан компонентларни етказиб беришдаги узилишлар сабаб мижозларга магнитоласиз етказиб берилади.

Харидорнинг розилиги билан амалга оширилувчи ушбу мажбурий чоранинг қўлланиши юзлаб истеъмолчиларга узоқ кутилган автомобилларни яқин орада етказилишини таъминлайди.

«UzAuto Motors» томонидан ушбу вазиятдан чиқиш учун магнитоласиз автомобиль харидорларига иккита вариант таклиф этилган:

• ишлаб чиқарувчи томонидан магнитола қурилмаси ҳамда унинг ўрнатилиш харажатларининг қопланиши билан яқин орада автомобилни магнитоласиз олиш, хоҳишга кўра, бозордан хоҳлаган турдаги автомагнитолани компания расмий дилерларида ўрнатиш;
• автомобилни кейинчалик текин қайта жиҳозлаш билан магнитоласиз олиб кетиш, ишлаб чиқарувчи томонидан магнитола етказиб берилгандан сўнг автомобилни қайта жиҳозлаш.

«Компания харидорлардан узр сўрайди. Сизни ишонтириб айтадики, юзага келган ноқулайликни минималлаштириш ва ҳар қандай вазиятда муроса қилиш учун имкон қадар барча ишларни қилади», дейилади расмий баёнотда.