Янгиликлар - 19:36 · 19.01.2022

ХТВ «кўзбўямачилик» деб баҳоланган видеога муносабат билдирди

Халқ таълими вазирлиги ижтимоий тармоқларда муҳокама қилинган, Андижондаги мактаб ходимларининг гимнастика машғулотлари акс этган видео юзасидан маълумот берди.

Кадр: Telegram

Таъкидаланишича, мазкур видеода Андижон вилояти Жалақудуқ туман 1-ИДУМ ходимларининг эрталабки ритмик гимнастика машғулотлари акс этган. Аммо тармоқ фойдаланувчилари ҳолатни «кўзбўямачилик» деб баҳолаган.

«Афсуски ижтимоий тармоқлардаги айрим каналлар томонидан ушбу видеога ‘Кўзбўямачиликнинг туби борми?’ дея таъриф берилган. Наҳотки, инсон саломатлиги ва кайфияти учун амалга оширган ушбу ритмик бадантарбия машқи ҳам биз учун салбий таассурот уйғотса?!

Соғлом турмуш тарзи фасл ва жой танламайди. Ривожланган давлатларда ҳам иш куни мана шундай бадантарбия машқлари билан бошланади. Бундай кайфиятда бошланган кун иш фаолиятида ҳам ўзининг ижобий таъсирини кўрсатади. Машқлар ўқитувчиларга қанчалик кайфият бағишлаётганини пайқаш қийин эмас», дейилади вазирлик хабарида.

Аввалроқ вазирлик география фани соатлари қисқараётганига оид эътирозларга жавоб қайтарган эди.