АҚШда республикачи Жим Бэнкс Россияга қарши янги санкциялар лойиҳасини тақдим этди. Бу ҳақда «РИА Новости» хабар берди.

Маълум қилинишича, лойиҳа «Путинни жавобгарликка тортиш акти» деб номланади ва қуйидаги бандларни ўз ичига олади:

• Донбассдаги «Россия томонидан қўллаб-қувватланган» кучларни террорчи деб эълон қилиш ва Россияни терроризм ҳомийси сифатида тан олиш;
• «Шимолий оқим 2» ва унга тегишли ташкилотлар ва уларнинг акциядорларига қарши чора кўриш;
• Россия давлат қарзи билан операцияларни тақиқлаш;
• АҚШ агентликларига ҳужумлар тугамагунча киберхавфсизлик бўйича мулоқотни молиялаштиришни тўхтатиш;
• Қрим Россияники бўлгунча, стратегик барқарорлик бўйича мулоқотни молиялаштиришни тўхтатиш;
• Россия президенти Владимир Путин, ҳукуматнинг барча аъзолари, расмийлар ва хавфсизлик ходимлари, жумладан, Россия етакчисининг матбуот котиби Дмитрий Песков, Москва мэри Сергей Собянин, президент маъмурияти раҳбарининг биринчи ўринбосари Сергей Кириенко, Марказий сайлов комиссияси раҳбари Элла Памфилова, президент маъмурияти раҳбари Антон Вайно, Тергов қўмитаси раҳбари Александр Бастрикин, ФСБ директори Александр Бортников, Миллий гвардия раҳбари Виктор Золотов ва бош прокурор Юрий Чайка;
• россиялик тадбиркорларга нисбатан санкциялар: Роман Абрамович, Алишер Усмонов, Олег Дерипаска, Игорь Сечин, Алексей Миллер, Андрей Костин, Геннадий Тимченко.

Шунингдек, лойиҳада МИА «Россия Сегодня» ва «РТ» телеканаллари бош муҳаррири Маргарита Симонян, теле ва радио бошловчи Владимир Соловьёв ва «Первий канал» бош директори Константин Эрнстга нисбатан санкция қўллаш илгари сурилган.

Аввалроқ «Путиннинг одамлари» китобининг Алишер Усмоновга оид қисмига ўзгартириш киритилгани хабар берилган.