АҚШ президенти Жо Байден раҳбарлик фаолиятининг йил якунлари бўйича матбуот анжумани ўтказди. Бу ҳақда «Press Telegram» хабар берди.

Маълум қилинишича, деярли 2 соат давом этган анжуманда президент Россия Украинага бостириб кирса, қандай чора кўришини айтган. У Украинада вазият кучайган тақдирда Россияга ҳалокат бўлишини ва Москва доллар билан операцияларни амалга ошира олмаслигини қайд этган. «Путин мен жорий этишга ваъда берган санкцияларни ҳеч қачон кўрмаганман», — деган Байден.

Ўз навбатида, у Россияга қарши жиддий санкциялар, жумладан, долларни тақиқлаш АҚШ иқтисодига салбий таъсир кўрсатиши мумкинлигини айтган. Байденинг фикрича, Путин Ғарбни, NATO’ни текширмоқда, лекин урушни хоҳламайди, у Украина билан боғлиқ вазиятда қандай йўл тутишни ҳали ҳал қилмаган.

«Агар улар босқинчилик қилса, бунинг учун товон тўлайди. Уларнинг банклари доллар билан операция амалга ошира олмайди», — деб ваъда берган Америка раҳбари.

Шунингдек, Оқ уй раҳбари Россия Украинага қарши хакерлик ҳужумларига алоқадор бўлса, унга қарши кенгайтирилган санкциялар қўллаш ўрнига киберқуроллардан фойдаланиши мумкинлигини айтган.

Аввалроқ АҚШ Афғонистон ҳарбий вертолётларини Украинага бериши хабар қилинган. Шунингдек, Россия Украинага яқин чегарада ҳарбий машғулот ўтказаётганидан лавҳалар эълон қилинган.