Чимён тоғ ҳудудида 19 январь куни қор кўчкиси содир бўлди. Фавқулодда вазиятлар вазирлиги ҳолат юзасидан маълумот берди.

Маълум қилинишича, шу куни тахминан соат 16:30 да Тошкент вилояти Чимён тоғ ҳудудининг денгиз сатҳидан 2300–3000 метр баландлигида қор кўчиш ҳолатлари кузатилиб, денгиз сатҳидан 1700 метр баландликда тўхтаган. Дастлабки маълумотларга кўра, қор кўчкиси тахминан 60 000 метр куб ҳажмни ташкил қилган.

Ушбу ҳодиса Чимён тоғ ҳудудининг ичкари қисмида, аҳоли яшаш жойидан тахминан 4–5 километр юқорида содир бўлган. Ҳодиса оқибатида жабрланган ва ҳалок бўлганлар тўғрисида вилоят Фавқулодда вазиятлар бошқармасига маълумот келиб тушмаган. Ҳозирда барча хавфсизлик чоралари кўрилиб, фуқароларнинг ҳудудга кирмаслиги ва ҳаракатни чеклаш мақсадида қўшимча белгилар ўрнатилмоқда.

Аввалроқ Амирсой дам олиш масканида қор кўчиши кузатилгани ҳақида хабар берилганди. Шунингдек, вазирлик Чимён ҳудудида қор кўчиши хавфидан огоҳлантирганди.