Экология қўмитаси собиқ матбуот котиби Бунёд Абдуллаев 2021 йил 9 февраль куни Очилбой Раматов учун «ижобий имиж яратиш»га қўшилмагани сабаб ишдан кетганди. Telegram’даги «ekologuz» каналида собиқ матбуот котибининг ишга тиклангани хабар қилинди.

Қайд этилишича, Бунёд Абдуллаев Экология ва атроф-муҳитни муҳофаза қилиш қўмитаси матбуот хизмати котиби этиб тайинланган.

Эслатиб ўтамиз, Бунёд Абдуллаев Facebook’даги саҳифасида пост қолдириб, унда ишдан кетганини ёзган. Шунингдек, уни қўллаб-қувватлаганларга раҳмат айтиб, кейинроқ бу ҳақда батафсил маълумот беришини билдирганди.

Маълумот ўрнида, 2 февраль куни бош вазир ўринбосари Очилбой Раматов ва у бошчилигидаги комплекс раҳбарлари, вазир ҳамда вазир ўринбосарлари иштирокида кенгайтирилган ҳайъат йиғилиши чақирилганди.

«Бу йиғилишда 6 нафар бошқарма бошлиқлари ишдан олинди. Жумладан, ўша куни ишдан кетади дейилганлар рўйхатида қўмитанинг Атмосфера ҳавосини муҳофаза қилиш бошқармаси бошлиғи Умид Абдужалилов, Сув, ер ресурслари ва ерости бойликларини муҳофаза қилиш бошқармаси бошлиғи Собир Машрабов, Халқаро алоқалар ва ҳамкорлик бўлими бошлиғи Жаҳонгир Толипов, юрист Даврон Холмуҳаммедов ва Қашқадарё вилоят бошқарма бошлиғи Ғанишер Иброҳимов ҳамда менинг исм-фамилиям бор эди», — дея маълум қилганди Бунёд Абдуллаев «Kun.uz»га.

Матбуот котибининг айтишича, ўзининг ҳам бу «рўйхатга тушиб қолиши»га икки ҳафта аввал «юқоридан келган ғалати топшириқ» сабаб бўлган. Бу топшириқ Транспорт вазирлигининг масъул ходимидан бўлган. Яъни қўнғироқда ўзини Раматовнинг маслаҳатчисиман деб таништирган киши унга бош вазир ўринбосарининг ижобий имижини шакллантириш мақсадида алоҳида штаб ташкил қилингани ҳамда шу имижни яхшилаш учун ҳафтанинг ҳар жума куни улар тасдиқлаган мавзу бўйича маълумот бериб туриш кераклигини буюрган. Бироқ Бунёд Абдуллаев унга раҳбарият томонидан қандайдир топшириқлар бўлсагина, бажаришини айтган.

Кейинчалик Абдуллаев қўмита раҳбарияти билан муносабатлари анча таранглашганини, қўмита раиси ва кадрлар бўлими бошлиғи ишдан бўшаш ҳақида ариза ёзиб беришни талаб қилиб, унга босим ўтказаётганини таъкидлаб ўтганди.

Шу билан бирга, Экология қўмитаси ишдан бўшаган собиқ матбуот котиби Бунёд Абдуллаев бўйича расмий муносабат билдириб, унинг важлари ҳақиқатга мос келмаслигини айтган. Қўмита Абдуллаевга босим ўтказилгани ҳужжатли асосга эга эмаслигини таъкидлаган. Баёнотда собиқ матбуот котибининг йиғилишдан чиқиб кетгани «қонун бузилиши» деб ҳисобланиши қайд этилганди.