Қозоғистоннинг биринчи президенти ва Хавфсизлик кенгашининг собиқ раҳбари Нурсултон Назарбоев камида 8 миллиард долларлик активларни бошқаради. Бу ҳақда OCCRP тадқиқотчи журналистлар уюшмаси ўтказган суриштирув материалида маълум қилинди.

Келтирилишича, Назарбоев президентлик даврида тўртта хайрия жамғармасига асос солган. Гап «Назарбаев Фонд», «Фонд Нурсултана Назарбаева», «Фонд Демеу» ва «Элбоши Фонд» ҳақида бормоқда. Журналистларнинг таъкидлашича, собиқ президент уларни шу кунгача яширинча бошқаришда давом этмоқда.

Ушбу жамғармалар қўлидаги активлар рўйхатига Қозоғистон, Қирғизистон ва Россиядаги банк, телеканаллар, меҳмонхона, савдо маркази, фабрика, омборлар, қиймати 100 миллион доллардан ортиқ бўлган шахсий самолёт, гольф майдончаси, облигациялар, нақд пул ва бир қатор камроқ эътиборга молик нарсалар, жумладан, макарон заводи ва ободонлаштириш компанияси киради.

Ҳисоботда таъкидланишича, миллиард долларлик активлар расмий равишда Назарбоевга тегишли эмас, балки тўғридан-тўғри жамғармаларга тегишли, аммо муаллифларнинг қайд этишича, сиёсатчи уларни ушбу ташкилотларнинг асосчиси сифатида назорат қилади. У маблағнинг ишлаши, шу жумладан, активларни сотиш ёки топшириш бўйича якуний қарорни қабул қилади.

Маълумот учун, «Қозоғистон республикасининг биринчи президенти тўғрисида»ги қонун Нурсултон Назарбоевга имтиёзлар беради, жумладан, у ўз ваколатлари даврида содир этган ҳаракатлари учун жавобгарликка тортилиши мумкин эмас. Шунингдек, Элбоши ва у билан бирга яшайдиган оила аъзоларига тегишли бўлган барча мол-мулк дахлсиз ҳисобланиб, Назарбоевнинг банкдаги ҳисоб-рақамлари дахлсизлиги кафолатланган. Ҳозирда Қозоғистонда унинг дахлсизлигини олиб ташлаш талаби билан петиция бошланган.

Аввалроқ Назарбоев ва унинг оиласи қандай имтиёзларга эгалиги хабар қилинган. Шунингдек, унинг қизи ва куёви намойишлар туфайли қанча пул йўқотгани айтилган.