Ўзбекистон Фанлар академияси Биоорганик кимё институтининг бир гуруҳ олимлари силга қарши «Биомайрин 600 мг» препаратини яратди. Бу ҳақда Инновацион ривожланиш вазирлиги хабар берди.

Таъкидланишича, ушбу препарат полигалактурон кислотаси (пектин) ва силга қарши препаратлар — изониазид, этамбутол ва рифампицин асосида олинган. Мазкур илмий лойиҳа тижоратлаштиришгача тайёрлаш мақсадида вазирлик томонидан 997,4 миллион миқдоридаги маблағ билан молиялаштирилган.

Препарат макромолекуляр табиатга эга бўлиб, табиий полимер полигалактурон кислота макромолекуласига силга қарши изониазид, этамбутол ва рифампицин кимёвий боғлар воситасида боғланган. Бунинг натижасида ушбу касалликка қарши бошқа препаратларга нисбатан организмга ножўя таъсири бир неча марта камайган ҳамда организмдаги самарали таъсир вақти бир неча марта ортган, яъни пролонгацияланган таъсирга эга. Препарат патоген ҳужайраларига йўналтирилган таъсир қилади ҳамда силнинг турли штаммларига нисбатан юқори фаолликка эга.

Сил бутун дунёда инсонлар соғлиғи учун хавф солувчи касаллик бўлиб, ўлим билан якунланувчи юқумли касалликлар орасида иккинчи ўринда туради. ЖССТ маълумотларига кўра, ҳар йили дунёда 10 миллионга яқин инсон сил касаллигига чалинади, шундан 1,5 миллиондан ортиғи ўлим билан якунланади. Бу кўрсаткич ковид пандемияси оқибатида янада ортган. Ўзбекистонда эса ҳар йили 25 мингга яқин киши сил касаллигига чалинади.

Сил касаллигига қарши янги самарали препаратлар мавжуд эмас эди. Ҳозирда қўлланилаётган препаратларнинг аксарияти ярим аср олдин яратилган ва қатор камчиликлари мавжуд. Жумладан, ушбу препаратларнинг организмга ножўя таъсири юқори бўлиб, даволаш жараёнида қўшимча ёндош касалликларнинг келиб чиқишига сабаб бўлади. Шунингдек, айни препаратларнинг организмдаги таъсир вақти қисқа (3–6 соат) бўлиб, организмда терапевтик концентрацияни сақлаш мақсадида кунига кўп марта қабул қилиш талаб этади. Бу, ўз навбатида, турли токсико-аллергик ҳолатларнинг келиб чиқишига сабаб бўлади.

Аввалроқ Ўзбекистонда тери вазифасини бажариб турувчи препарат яратилгани ҳақида хабар берилганди.