Ўзбекистондаги мактаб ва олийгоҳларда 24 январдан онлайн таълим бошланиши ҳақида хабарлар тарқалди. Уларга аниқлик киритиш мақсадида «Bugun.uz» тегишли вазирликлар билан боғланди.

Халқ таълими вазирлиги матбуот котиби Лайло Рустамованинг сўзларига кўра, аввалроқ вазирлик томонидан қишки таътил 24 январга қадар узайтирилгани ҳақида хабар берилган ва ҳозирда ўқувчиларнинг анъанавий таълимга қайтишига тайёргарлик кўрилмоқда. Айни вақтга қадар онлайн таълимга ўтиш бўйича ҳеч қандай режа йўқ.

«Шу ўринда жамоатчиликдан фақат расмий каналлар орқали эълон қилинадиган янгиликларга ишонишларини сўраб қоламиз», — деган у.

Шунингдек, Олий ва ўрта махсус таълим вазирлиги белгиланган тартибга кўра, коронавирус инфекцияси билан боғлиқ эпидемиологик вазият юзасидан Республика махсус комиссияси қарор қабул қилиши ҳамда барча идора ва ташкилотлар, шу жумладан, олий таълим муассасалари ҳам мазкур қарор асосида иш юритишини маълум қилган.

«Шундан келиб чиққан ҳолда Республика махсус комиссиясининг амалдаги қарорида дарс жараёнларини 24 январдан онлайн шаклда бошлаш назарда тутилмаган. Бу борада махсус комиссия қарор қабул қилган тақдирда, вазирлик расмий манбалар орқали қўшимча маълумот беради», — деган вазирлик ходими.

Аввалроқ Халқ таълими вазирлиги Ўзбекистонда мактаб ўқувчилари учун қишки таътил санаси 1 мартгача узайтирилиши ҳақидаги хабарларни рад этганди. Шунингдек, Ўзбекистон ОТМларида таълим жараёнлари онлайнга ўтказилмаслиги маълум қилинган.