Россиянинг Томск вилоятида мигрантларнинг меҳнат фаолияти учун патент нархи 435 рублдан ошди. Бу ҳақда «Томская Газета» хабар берди.

Маълум қилинишича, патент нархи чет эл фуқароларининг ойлик тўлови ва иқтисодиётнинг ўхшаш тармоқларида ишлайдиган Россия фуқаролари томонидан тўланадиган шахсий даромад солиғига мувофиқ белгиланади. 2022 йилда мигрантлар минтақадаги меҳнат фаолияти учун 4 минг рублдан ортиқ пул тўлаши керак бўлади.

Таъкидланишича, 2021 йилга нисбатан патент нархи ойига 435 рублга ошган. Бу вилоят бюджети даромадига қўшимча равишда 12 миллион рублга яқин маблағ жалб қилиш имконини беради. 2022 йилда меҳнат муҳожирларидан кутилаётган даромад миқдори 133 миллион рублни ташкил қилмоқда.

Эслатиб ўтамиз, Абхазия, Озарбайжон, Ўзбекистон, Тожикистон, Молдова ва Украина фуқаролари меҳнат фаолиятини патент асосида амалга оширади. Қонун лойиҳаси қоидалари Евроосиё иқтисодий иттифоқига аъзо бўлган давлатлар (Арманистон, Беларусь, Қозоғистон, Қирғизистон) фуқароларига нисбатан қўлланмайди.

Патентнинг қиймати бўйича Томск вилояти Россия ҳудудлари орасида 48-ўринни ва Сибир федерал округининг таъсис субъектлари орасида 6-ўринни эгаллайди. Эслатиб ўтамиз, Москвада 2022 йилдан бошлаб меҳнат муҳожирлари учун патент нархи 5341 рублдан 5900 рублгача ошиши белгиланган.

Аввалроқ Россияда мигрантлар учун янги қоидалар кучга кирганди. Шунингдек, Россияда мигрантларга янги кўринишдаги патент берилиши хабар қилинган.