Ўзбекистоннинг йирик металлургия объектларини 2018-2021 йиллар давомида бошқарган «SFI Management Group» акциядорлик жамиятининг инвестицион объектларни ишончли бошқариш бўйича лицензияси бекор қилинди. Бу ҳақда Молия вазирлиги матбуот хизмати хабар берди.

Маълум қилинишича, лицензия Молия вазирлигининг 2022 йил 14 январдаги тегишли қарори билан бекор қилинган. Бунга корхонанинг лицензияни бекор қилиш ҳақидаги аризаси сабаб бўлган.

«SFI Management Group» 2017 йилдан бошлаб «Ўзметкомбинат» акциядорлик жамиятини, 2018 йилдан эса «Олмалиқ кон-металлургия комбинати» ва «Ўзвторцветмет» акциядорлик жамиятларини бошқара бошлаган. 2021 йил 17 февралдан бошлаб эса «SFI Management Group» юқоридаги 3 та акциядорлик жамиятини ишончли бошқариш бўйича шартномани келишув асосида бекор қилган.

Қайд этилишича, шартнома тугатилишига ҳукумат томонидан юкланган вазифаларнинг аксарият қисми бажарилгани, барча корхоналар мустақил бошқарувга тайёрлиги сабаб бўлган.

Эслатиб ўтамиз, «SFI Management Group» 2017 йил 26 январда ташкил этилган. Корхона раҳбари Вохид Мирзаев ҳисобланиб, таъсисчиси «Allied Capital Holding S.A» компанияси ҳисобланади. 2018 йилда миллиардер Алишер Усмонов «SFI Management Group» Фаттоҳ Шодиев оиласига тегишли компания эканини таъкидлаганди.

Корхона 2017 йил август ойида инвестиция мажбуриятларини бажариш шарти билан «Пахтакор» футбол клубининг устав капиталидаги 80 фоиз улушни сотиб олган. Ўшанда корхона беш йил давомида «Пахтакор»га камида 200 миллиард сўм сармоя киритишни режалаштирганди.

Шунингдек, клуб учун барча инфратузилмаларга эга, замонавий талабларга жавоб берадиган янги стадион қуриш лойиҳаси ишлаб чиқилаётгани, икки йил ичида эски стадион ўрнида янгиси қурилиши режалаштирилаётгани таъкидланган.