Андижон шаҳрида эркак 2021 йилнинг 3 сентябрь куни синглисини олиб кетишини айтиб жанжал кўтарган қайнопасини пичоқлаб ўлдиргани учун 12 йилга қамалди. Бу ҳақда вилоят суди матбуот хизмати «Bugun.uz»га маълум қилди.

Хабарга кўра, қотиллик иши жиноят ишлари бўйича Андижон шаҳар суди раиси Рустам Тургинов раислигида кўриб чиқилган. Маълум қилинишича, С.Б. Андижон шаҳрида қайнопаси Г.М. билан оилавий келишмовчилик сабаб жанжаллашиб, хўжалик пичоғи билан Г.М.ни қувиб, унинг кўкрак қисмига пичоқ билан қасддан тан жароҳати етказиб, қасддан ўлдирган. Суд-тиббий экспертизаси хулосасига кўра, Г.М.га чап кўкрак қафасидаги кўкрак қафасига тешиб ўтувчи санчилган кесилган яраси, чап ўпка бўлаги ва аорта ёйининг жароҳатланиши, ички ва ташқи қон кетиши, чап кўкрак бўшлиғида 1700 миллилитр суюқ қон ва қон лахталарининг мавжудлиги каби жароҳатлари билан ҳаёт учун хавфлилик мезонига кўра оғир тан жароҳати унинг ўлимига сабаб бўлган.

Судланувчи С.Б. судда ўзига эълон қилинган айбловга тўлиқ иқрор бўлиб, ҳақиқатан ҳам қайнонаси Х.М. ва қайнопаси Г.М. яшаш хонадонига келганида онаси уларни кутиб олиб, меҳмонхонага олиб киргани, Х.М. бақир-чақир қилиб, қизини сиқаётганларини, ажраштириб юборишини айтгани, жанжал бўлмаслиги учун аралашмасдан уйга кириб кетганини маълум қилган.

Шунингдек, Х.М. ва Г.М. уни уйдан чақириб, ҳақоратлаб, нафсониятига тегадиган гаплар айтиб, онасини кўча дайдиси деб, бақир-чақир қилганидан жаҳли чиқиб, карахт ҳолатда Г.М.нинг сочидан тортиб, дарвозахонага судраб чиққани, сўнг ошхона олдида турган столдан хўжалик пичоғини қўлига олганини билдирган. Г.М. эса пичоқни кўриб, рўпара қўшнисининг уйига қочиб киргани, унинг ортидан қувиб, Г.М.га пичоқ тиқиб олгани, аёл йиқилганида пичоқни ташлаб қочиб чиқиб кетгани маълум бўлган. С.Б. ҳозирда қилган ишидан пушаймонлигини, Г.М.ни ўлдириш нияти бўлмагани, 2 нафар фарзанди борлигини айтиб, енгиллик берилишини сўраган.

С.Б. Жиноят кодексининг 97-моддаси (Қасддан одам ўлдириш) 1-қисмида назарда тутилган жиноятни содир этганликда айбдор деб топилган. Унга 12 йил муддатга озодликдан маҳрум қилиш жазоси тайинланган. Шуниндек, жазони умумий тартибли колонияларда ўташ белгиланган.

Шунингдек, судланувчидан жабрланувчининг қонуний вакили Х.М. фойдасига 22 миллион сўмлик моддий ва маънавий зарарлар ундирилиши белгиланган.

Аввалроқ Бухорода эркак хотинини кўкрак қафасига пичоқ уриб ўлдиргани хабар қилинганди.