«Омикрон» штами коронавирус инфекциясининг энг хавфли варианти ҳисобланмаса-да, грипп билан бирга салбий оқибатларга олиб келиши мумкин. Бу ҳақда россиялик биология фанлари номзоди Роман Зиновкин «Sputnik»ка маълум қилди.

Келтирилишича, бу штамдан ўлиш кўрсаткичи паст, бироқ грипп инфекцияси билан у ўзгаришга учрайди. «Англия тажрибасига кўра, ‘омикрон’дан ўлим хавфи тахминан беш баравар камайди ва бу яхши янгилик. Аммо турли инфекцияларга бир вақтда чалиниш бу ёмон хабар. Олимлар сичқонларга грипп ва ковид юқтириб, тадқиқот олиб борди. Натижада коронавирус инфекцияси фонида грипп ёмон асоратларни келтириб чиқарди. Инфекцияларнинг устма-устлиги ўлимнинг ошишига олиб келиши мумкин. Қўшалоқ эпидемия, яъни грипп ва коронавирус инфекцияси соғлиқни сақлаш тизимини издан чиқариши мумкин», — дейди биолог.

Шунингдек, мутахассис касалланишдан ҳимояланиш бўйича қатор тавсиялар берган.

«Агар сиз узоқ вақт давомида ковидга қарши эмланган бўлсангиз, бустер доза қабул қилишингиз керак. Бундан ташқари, совуқ мавсумда қуйидагиларга риоя қилиш керак: совуқ қотмаслик, диетага эътибор бериш, Д3 витамини даражасини кузатиш. Кўпгина мамлакатларда шифокорлар ҳам цинк истеъмол қилишни тавсия этади. Ниҳоят, ниқоб тақиш инфекциянинг олдини олади», — дея хулоса қилган Роман Зиновкин.

Аввалроқ кимлар бир вақтнинг ўзида грипп ва ковидга чалиниши мумкинлиги айтилган. Шунингдек, ковид яқин келажакда қандай ривожланиши маълум қилинган.