Иммунологлар нима учун ҳид билиш ҳиссининг йўқолиши «омикрон» билан касалланганларда кузатилмаслигини маълум қилди. Бу ҳақда «МИР 24» хабар берди.

Келтирилишича, россиялик шифокор, тиббиёт фанлари номзоди Николай Крючков бу коронавирус штамининг ўзига хос хусусияти билан боғлиқ эканини айтган. У бунга икки омил, яъни штаммнинг нервларга камроқ таъсирчанлиги ва «омикрон» камроқ хавфлилиги учун кўпроқ симптомсиз ўтиши сабаб бўлишини айтган.

Ўз навбатида, яна бир мутахассис — аллерголог-иммунолог Владимир Болибок фақатгина 20 фоиз ҳолларда, ҳар бешинчи одамда ҳид билиш ҳисси йўқолишини қўшимча қилган. Мутахассис бу аломат касалликнинг деярли охирида намоён бўлиши, дастлабки коронавирусда эса бу симптом бошида кузатилганини қайд этган. «Бундан ташқари, ‘дельтаʼ штамида аллақачон ҳид билиш ҳиссининг йўқолиши сезиларли даражада камайган», — деган у.

Болибок асосий симптом ҳали ҳам ҳароратнинг ошиши эканини қўшимча қилиб, бу 90 фоиз ҳолларда содир бўлишини айтган.

Аввалроқ коронавируснинг инсон ҳаёти давомида сақланиб қоладиган аломати маълум қилинган. Шунингдек, кимлар «омикрон»дан яхши ҳимоялангани хабар берилган.